مەسعود بارزانی: بەغداد پابەند نەوی وەو رێککەفتنه شەنگال بیه‌یده ده‌س خاوەنی
شەفەق نیوز/ مەسعود بارزانی سەکردەی کورد، ئمڕوو دووشەممە، وت: رێککەفتنیگ بەسیا وەگەرد حکومەت عراق لەوەخت وەناوهاتن سوپای عراق ئەرا شەنگال، ک بایەسە خەڵکە رەسنەگەی وەڕێەوبوەن دویای رووداوەگان تەشرین یەکەم ٢٠١٧ ، وتیش؛ حکومەت عراق پابەند نەوی لە رێککەفتنەگە و شەنگال داگە دەس مەردمەیگ تر.
لە پەیامەگەی بارزانی ک رەسیە ئاژانس شەفەق نیوز، وەبۆنی ساڵیاد شەشەم ئەرا داگیرکردن شار شەنگال لەلایەن داعش لە سێی ئاب ٢٠١٥ ، وت: ئمڕوو شەش ساڵ لەبان کارەسات جینۆسایدەگە لە سەنجار رەدبوود، ئەو کارەساتە ک تیرۆرستەیل داعش وەگشت توندڕەوییگ تاوانیان دژەو ئەیزیدیەگان کردن، جوور زەخم قوولیگە لەبان لەش گەل کوردستان، وقەت لە هویرەو نێەچوود.
بارزانی وتیش: ئامانجکردن ئەیزیدیەگان لەوەر ئەوە هات ک خوەیان کوردن، ولەوەر باوەڕەگانیان کەفتنە وەر پەلامار بێ به‌زه‌ییانه و بی ویژدانی لەلایەن تیرۆرستەگان، و ئەو تاوانە وە دژیان کریا وەردەوامی ئەو زەنجیرە بوی لە کارەسات وتاوانەگان دژوە گەل کوردستان لە دریژایی مێژوو.
بارزانی دووپاتکرد؛ لە پاڵپشتی وەگشت تواناگانی ئەرا داواکاری ئیزیدیەگان ئەرا چگنەوەیان وەرەو ماڵەیلیان و ناوچەیلیان وەسەربەرزی، وژیان سه‌قامگیر و ئارامیگ ئەرایان بوود، دویر لە ستەم، وبتوێنن كاروباریان لە ناوچەیلیان وەڕیەو بووەن، وباس خەفتی کرد ک شەنگال لەدوای رووداوەیل ١٦ تەشرین یەکەم بکەفێدە ژیر کاریگەری دوژمنەیل کوردستان.
بارزانی وتیش: لەوە وەختە و ئەرا نەهیشتن لە دووارەبوین کارەساتەیلیگ تر و رشانن خوونەیلیگ تر لەناوبەین ئەیزیدیەگان، رێککەفتن بوی شەنگال لەلایەن ئەیزیدیەگان وەڕیەو بووریەێد، بەڵکم حکومەت عراق تا ئیسە پابەند نەوی وە رێککەفتنەگە، و شەنگال کەفتە دەس کەسەیلیگ تر، ئەراوە تا ئیسە ئەیزیدیەگان لە ناوچەی شەنگال دڵنیا نێن لەبان ژیان و دویا رووژیان، و نەچگنەو ئەرا ناوچەیلیان و مەنن لە رەوشەیل ئاوارەیی و ژیان کامپەگان، وئەیە لە راسیەو ستەم گەورایگە.
بارزانی جەختکرد ک بایەسە ئی رەوش ناسروشتیە لە شەنگال تەواوبوود و شەنگال باێدەو ئەرا خاوەنه رەسەنەگانی، و بایەسە ریکارەیلیگ بووریەید مسۆگەر بکەێد کارەسەتەگان وستەم و تاوانەگان دووراەو نەوون دژوە ئەیزیدیەگان وئەو پێکهاتەگان.
