مەسعود بارزانی: هەڵبژاردن هەرێم کوردستان لە مەوقەی خوەی کریەێد
شەفەق نیوز/ مەسعود بارزانی سەرۆک پارت دیموکراتی کوردستان، ئمڕوو پەنجشەممە، دووپات کرد ک هەڵبژاردن پەرلەمانی لە هەرێم کوردستان، ئەوەسا لە مەوقەی دیاریکریاگ خوەی، لە مانگ ئەیلوول ئی ساڵە ئەنجام دریەێد.
ئەوەیش لە چەوپیکەفتنی وەگەرد ماوريتسيو کریکانتی باڵیۆز ئیتاڵیا لەلای عراق لە سەیرانگای سەڵاحەدین هات، وەگورەی بەیاننامەیگ لە بارەگای بارزانی.
لە چەوپیکەفتنەگە، باس رایەیلیان لەباوەت رەوش سیاسی عراق، و گامەیل دەستووری لە دۊای یەکەم دانیشتن ئەنجومەن نۊنەرەیل، و بڕیارەیل دادگای فیدراڵی باڵای عراق کریا.
لەلای خوەییش، باڵیۆز ئیتاڵیا لە عراق باس رێز خوەی ئەرا قوربانیەیل هێزەیل پێشمەرگەی کوردستان کرد لە جەنگ دژوە تیرۆریستەیل داعش، و دووپات کرد ک وڵاتەگەی ئەوەسا وەگەرد هاوپەیمانەیل وەردەوام بوود لە پشتگیریکردن پێشمەرگە و هێزەیل عراق.
لەلاییگ تر لەناو دیدارەگە، وەگەرد دەسنشانکردن ئەرا پەیوەندیەیل میژووی ناوبەین هەردوگ لایەنەگە، دووپات لە گەشەکردن و قۊلکردن برادەری ناوبەین گەل کورد و گەل ئیتاڵیا و بتەوکردن پەیوەندیەیل ناوبەین ئیتاڵیا ئە هەرێم کوردستان کریا.
رەوش ناوخۆیی، و هەڵبژاردن هەرێم کوردستان، تەوەرەیلیگ تر بۊن لە دیدارەگە، ک بارزانی دووپات کرد ک هەڵبژاردن هاتگ لە هەرێم کوردستان ئەوەسا لە مەوقەی دیاریکریاگ خوەی ئەنجام دریەێد.
