مەسعود بارزانی سەرەخوەشی لە بنەماڵەی یەدولڵا فەیلی کەێد
شەفەق نیوز/ مەسعود بارزانی سەرۆک پارت دیموکراتی کوردستان، ئمڕوو پەنجشەممە، پەیام پرسە و سەرەخوەشی ئەرا بنەماڵەی رەحمەتی یەدولڵا فەیلی وەزیر وەرین لە حکومەت هەرێم کوردستان وئەندام دەسەی مەرکەزی لە پارتی دیموکراتی کوردستان کلکرد.
بارزانی لە پەیامەگە ک ئاژانس شەفەق نیوز نووڕیەی وت: وە خەفەت و خوسەی فرەیگ چاو مردن خەباتکار و پێشمەرگەی شۆڕش ئەیلوول و وەزیر لە کابینەی چوارەم حکومەت هەرێم کوردستان و کەسایەتی ناودیار کاک عەبدولکەریم موڕاد ک وە یەدولڵا فەیلێ ناسریاگە وەرگردیمن.
وتیش: وەی کەلەمەی سەختە، هاوخەم ئیوەیمن، و ئەرا خوەدان و خیزان نیشتمانپەروەر و خەباتکاردان و گشت برایل کورد فەیلی گەرمترین سەرەخوەشی و هاوخەمەی پیشکەش کەیمن، و لە خودای گەورە داوا کەم رەحمەتی کاک یەدولڵا فەیلی بخەێدە وەر رەحمەت و دروودی و بخەێدەی بەهیشت هەتاهەتایی و سەبوری ئیوە بەێد.
یەدولڵا فەیلی وەزیر وەرین کاروبار هەرێم کوردستان، رووژ دووشەممەی گوزەشتە، لە تەمەن ٨٨ ساڵی لە شار هەولێر پایتەخت هەرێم کوردستان دویاکووچی کرد.
