لاتی دەێدە خانەقین لەوەر بیکاری و نەوین بوودجەی خزمەتگوزاری
شەفەق نیوز/ دەسەی هەرەوەزی لە خانەقین، ئمڕوو سێشەممە، باس بەرزەوبوین وەرچەویگ لە ئاست لاتی و نەداری کرد، لەوەر بیکاری و نەوین بوودجەیل خزمەتگوزاری ئەرا قەزاگە.
سەلام عەبدولڵا ئەندام دەسەگە ئەرا ئاژانس شەفەق نیوز وت: ئاست لاتی لە خانەقین ئەرا ٤٠٪ بەرزەو بوی لەوەر نەوین دەرفەتەیل فەرمانبەری و بیکاری و نەوین بوودجەیل خزمەتگوزاری و پەککەفتن کەرت تایبەت.
عەبدولڵا باس هووکارەیل لاتی و بیکاری لە خانەقین و ناوچەو پارێزگایلیگ تر کرد ک لەوەر رمانن کەرت گشتی وە پڕۆژە و مەرجەیل سەندووق پویل ناودەوڵەتی بویە، وەگەرد ئاڵشتکردن کەرت خزمەتگوزاری گشتی ئەرا کەرتەیلیگ تایبەت سەروە نووسینگەیل حزبە سیاسیەیلە.
وتیش؛ کەرت خزمەتگوزاری بەشەو بویە بان حزبەیلە ک وەخراوی هاتە بان رەوش ژیان و گوزەرانی لە گشت وڵاتەگە وەتایبەت لە شار خانەقین.
عەبدولڵا داوا کرد سیاسەتەیلیگ حکومەتی وەکار باریەێد ک گرفتەیل کەرت خزمەتگوزاری چارەسەر بکەن و دامەزراوەیلی لە بەشبەشەکی ئازاد بکەن ک جوور بار نوویگە لەبان گەردن خەڵکەگە.
