لە یاد جینۆساید...نێچیرڤان بارزانی داوای قەرەبوکردن کوردەیل فەیلی لە حکومەت فیدراڵی کەێد
سەرۆک نێچیرڤان بارزانی لە بەیاننامەگەی وت، " ئمڕوو لە 43هەمین تاوان جینۆساید و بیسەروشوینکردن و وڵات وەدەرکردن خوەشک و برایەیل کوردەیل فەیلی وە شکۆ و رێز یاد شەهیدەیل و قوربانیەیل ئەو تاوانە کەیمن".
وتیش" ئەوەگ دژ وە کوردەیل فەیلی کریا پاتاویگ نەژادی و رەگەزپەرەستانە بوی، بیجگە لە سەرنقومکردن دەیان هەزار هاوڵاتی بیتاوان، سەدان هەزاریش دووچار راگواستن و و بارکردن و زەفتکردن ماڵ و موڵکەیلیان و سەنین رەگەزنامە لەلیان بوینە تەنیا لەوەر ئەوەگ کورد بوین و داکۆکی لە مافەیل رەوایان کردن".
سەرۆک هەرێم کوردستان وتیش، ناسانانن ئەو تاوانە وە جینۆساید وەلایەن دادگای باڵای تاوانەیل عراق، حکومەت و دەوڵەت عراق رویوەڕوی ئەرک و بەرپرسیارەتی یاسایی و مرۆیی کەێد ئەرا قەرەبووکردن قوربانیەیل، لەی یادە داوا لە حکومەت فیدراڵی عراق کەیمن ئەرک خوەی جیوەجی بکەێد وە قەرەبووکردن و گلەوداین گشت مافەیل مەدەنی و مادی کوردەیل فەیلی".
لە کۆتایی وتیش، درود و سەڵام ئەرا گیان پاک شەهیدەیل کورد فەیلی، سڵاو و رێز ئەرا خانەوادەیل سەربەرزیان، قوربانیدان و دڵسۆزیی خوەشک و برایەیل کوردەیل فەیلیمان جی شانازی مللەتەگەمانە هەمیشە هانە یادمان.
