سەرۆک هەرێم کوردستان: ئاشتی جەهانی هالە مەترسی و راسەوبوین رییگە ئەرا چارەکردن گرفتەیل عراق و ناوچەگە
شەفەق نیوز/ نێچیروان بارزانی سەرۆک هەرێم کوردستان، ئمڕوو دووشەممە، وت: عراق و ناوچەگە ئەرا چارەکردن گرفتەیل گیرهاتگ وقەیرانەیل راسەوبوین خوازێد.
بارزانی لە وتاریگ لەناو کۆنگرەی ئاشتی و راسەوبوین ک ریخریاگ سپارک هۆڵەندی خەێدەی ری، وت: لەوەختیگ جەهان کەفێدە وەر چەن سەختییگ، تایبەت ک سەردەم کۆڕۆنا وململانە وجەنگەیل هیشتن ئاشتی بکەفێدە مەترسی، ک هویچیگ لە ئاشتی ئەرا ناوچەگە خاستر نییە. وتیش: ئەگەر عراق بکەیمنە نموونە، خوازینی ئەرا ئاشتی نووڕیمن، ک ئەوەیش کاریگەری لەبان دەوڵەتەیل هەرێمی و ئاشتی جەهانییش داشت، وئەگەر تەنیا باس سەردەم نوو عراق بکەیمن، خوو ئەو کارەساتەیلە دوینیمن ک عراق هاوردەی ری خود وڵاتەگە ودەوڵەتەیل هەرێمی، لەلیان جەنگ وەگەرد ئیران وجەنگ داگیرکردن کوەیت، ئمجا جەنگ ئازادکردن کوەیت ئیجا جەنگ ئازادکردن عراق، یە گشتی لەوەر نەوین هویر ئاشتی و راسەوبوین.
وتیش: ئیمە ئاشتییگ راسی خوازیمن، ئاشتییگ ک گشتی باوەڕ وەپی داشتوود، لە گشت مەزهەو و تایفەیل، ک گشتی وەردیەوکەو وەئاشتی و خوەشبوین ژیان بکەێد، باوجی چوین توەنیمن ئی ئاشتیە لە عراق بینا بکەیمن؟، یە پرسیاریگە هەمیشە خوەی خەێدە وەردەس، ک عراق نموونەیگ بویچگە لە ناوچەی خوەرهەڵات ناوڕاس، ک راسەوبوین وقویکلردن هویر لەناوبردن تونوتیژی خوازێد، ئیمە ئاشتی لەناو خیزان و لە پەروەردە وهووکارە و لەسیاسەتیش خوازیمن، بایەتە پیاوەیل ئاینی و سیاسەتمەدارەیل هویر راسەوبوین بیاشتان، لە وڵاتیگ رەنگاوڕەنگی لە مەزهەو و نەتەوەیل، ک ئەگەر ئاشتی و راسەوبوین نەوود، داعش وجوند ئیسلام وکۆمەڵە تونەڕەوەیل پەیا بوون.
سەرۆک هەرێم کوردستان وتیش: ئەگەر حکومەت عراق وە شیوەیگ راستەقینە وەگەرد گرفتەیلی رەفتار بکەێد، وپەنا وە ئاشتی بوەێد، بیگومان ئی کارەساتەیلە نەهاتیادە ری عراق، و هەمیش ئی بەسیان سیاسیە لە عراق لەوەر نەوین راسەوبوین کەفتیەسە دی.
ک ئەگەر سیاسەتمەدارەیل کەمیگ راسەوبوین بیاشتان، وەنە کارەگە نەڕەسیە ئی ئاستە، باوجی لەجیای راسەوبوین، توندڕەوی زاڵە.
