رویداو هاتوچو کۆتایی وە ژیان یەکەم ژنیگ تێرێد ک خاوەن موولەت رانندگی بویە لە دهۆک

شەفەق نیوز/ وەریەوبەرایەتی پۆلیس پارێزگای دهۆک، ئمڕوو چوارشەممە، خەوەردا لە مردن ژنیگ وە رویداو هاتوچو لە نزیک ناوەن پارێزگاگە. 

وەریەوبەرایەتیەگە لە بەیاننامەیگ راگەیان، رویداو هاتوچوەگە لە ساعەت 8:30 دویەشەو سێشەممە لە رێ سەرەکی مابەین ناحیەی زاوێتە و ناوەن شار دهۆک رویدایە لەئەنجام لە یەکداین دوو ماشین. 

وتیش، رویداوەگە بویە مدووی مردن ژنیگ و زەخمداری یەکیگتر. 

پەیامنێرمان وت: نەوال ئسماعیل عەبدولرەحمان ک وە رویداو هاتوچوەگە گیان لە دەسدا، یەکەم ژن بوی لە پارێزگای دهۆک بویە خاوەن مۆلەت رانندگی لە ساڵەیل هەشتاگان گوزەشتە.