ئەرا نواگردن تونوتیژی دژوە ژن.. دامەزرانن ریخریاییگ ژنانە لە گەرمیان.. وینە
شەفەق نیوز/ لە چوارچێوەی هەڵمەت جەهانی رویوەرویبوین تونوتیژی دژوە ژن، ک ئەرا ماوەی 16 رووژ رووژ وەردەوام بوود، دامەزرانن ریخریاگ ژنانەی (شۆخ) لە گەرمیان راگەینیا، ئەرا ئەوزەڵکردن توانایل ژن لە گەرمیان، و کارکردن ئەرا دەرخستن توانایل ژن و زیایکردن هووشیاری ئەرا نواگردن تونوتیژی دژوە ژن.
هەیفا مەجید خانمە وەڕیەوبەر ریخریایەگە ئەرا ئاژانس شەفەق نیوز وت: ئمڕوو وە فەرمی راگەیانن ریخریاگمان کردیمن، وە ئامادوبوین سەرپەرشتیاری ئیدارەی گەرمیان و بڕیگ لە وەرپرسەیل حکومەتی و حزبی، و بەرنامەی کاریان لەی ماوە ئاشکرا کردیمن، ک ئی ماوە تایبەتە وە رویوەرویبوین گشت شیوەیل تونوتیژی دژوە ژن.
وتیش: ریخریایەگە گورج و پسپۆڕە، و ئەوەسا ئەرا دەرخستن توانا و بەهرەیل ژن لە گشت بوارەیل کار کەێد.
وتیش: بارەگای سەرکی ریخریایەگە کەفێدە گەرمیان، باوجی ئیمە کارەیلمان لە گشت ناوچەی هەرێم کوردستان وەگورەی ریسگا بەرنامەیل ئەنجام دەیمن.
لەباوەت چالاکیەیل ریخریایەگە، خانمە وەڕیەوبەر ریخریایەگە وت: وە کۆنگرە و کۆڕ وچالاکەیل هەمەڕەنگ و هوشیارکردن ئەرا تاکەیلیگ لە هەردوگ ڕەگەز وەڕیەو چن.
مەجید دیاری کرد ک چالاکیەیل راگەیانن ریخریایەگە ک کەفتە وەرد هەڵمەت جەهانی رویوەرویبوین تونوتیژی دژوە ژن، نمایشکردن ڤیدیۆ و گورانی فۆلکلۆری ئەرا دویەتەیل خانەقین سەروە وەڕیەوبەرایەتی روشنهویری و هونەرەی لە خانەقین لەناوی بوی، وەگەرد پیشکەشکردن پارچەیل لە شعر ژنانە، وهەمیش وتار بەڕێز سەرپەرشتیار ئیدارەی گەرمیان.
