خانەقین.. زاڵبوی کۆڕۆنا و بی پشتگیریکردن دارایی

خانەقین.. زاڵبوی کۆڕۆنا و بی پشتگیریکردن دارایی
2021-06-21T15:38:32+00:00

شەفەق نیوز/ عەباس ئەرکەوازی، وەڕێبەر رووشنهویری و هونەرەیل لە خانەقین، ئمڕوو دووشەممە، داد لە وسانن ٨٠٪ لە چالاکیەیل کرد لەوەی قەیران دارایی لە هەرێم کوردستان و پەتای کۆڕۆنا، و جەخت کرد لە گرنگی گورجکردن دەور وەڕێۆبەرایەتیەگە ک جوور هەڵقەی گریەبەسیگە لەناونی هوونەرمەنەیل و رووشنهویرەیل باشوور و ناوڕاس و باکوور عراق.

ئەرکەوازی ئەرا ئاژانس شەفەق نیوز وت: ئامانج وەڕێۆبەرایەتیەگە ئەوەسە ک بوودە پوڵیگ لەناونی هوونەرمەنەیل باکوور و ناوڕاس و باشوور، و چەن دیداریگ هونەری ئەنجام دریا ک ئەزموونەیل ناوبەین گشت هونەرمەنەیل پارێزگایل هەر لە باکوور تا باشوور  لەناوی تیکڵا بوین، وەخاتر بەرهەمکردن کەلتوور نیشتمان، وەلێ پەتای کۆڕۆنا نەیشت گردەوبوینیگ تر ئەنجام بیریەێد.

وتیش؛ گرنگترین گرفت و ریگرەیل کار وەڕێۆبەرایەتیەگە ئەوەسە ک لەوەر رەوش سەخت دارایی حکومەت هەرێم کوردستان، تا رەسێدە پەتای کۆڕۆناس ک ٨٩٪ لە چالاکیەیل وەڕێۆبەرایەتیەگە وسان.

عەباس ئەرکەوازی وتیش؛ پلان تەواوەتییگ ئەرا ئی ساڵە دانایمن،  و لەبان گرفتەیل پشتگیریکردن و کۆڕۆنا ٥٠٪ لەلای جیوەجی کردیمن، و پێشەنگایل هونەری و کۆڕەیلیگ شعری و هونەری و گردەوبوین رووشنهویری ئەرا دووسەیل هونەر و رووشنهویری خانەقین ئەنجام دایمن، وەگەرد جیوەجیکردن پڕۆژەی داناین پەیکەر هونەرمەن عەلی وەندی وەی نزیکە.

وتیش؛ وەڕێۆبەرایەتیەگە سەروە وەڕێۆبەرایەتی رووشنهویری و هونەرەیل گەرمیانە سەروە وەزارەت رووشنهویری و گەنجەیل لە هەرێم کوردستان، و بەشەیل پلانسازی و چەودیریکردن و ئیدارە و مۆسیقا و هونەر شیوەکاری هالە ناوی، وەگەرد بڕیگ لە دووسەیل هونەر لە چینەیل شانۆ و شعر و شیوەکاری.

ئەرکەوازی وتیش؛ وەگەرد وەڕێۆبەرایەتیەگە، ٤ ماڵ کەلتووری تر هەس سەروە هیچ لایەنیگ حکومەتی یا حزبی نییە، ک خوەی ماڵ شەهید سەلام، و ناوەند کەلتووری خانەقین، و ناوەند گەنجەیلە، ک وەردەوامە لە پێشکەشکردن چالاکیەیل دویر لە هەر حزبایەتییگ.

Shafaq Live
Shafaq Live