(تایبەت) دۊای هەڵوژاردن سەرۆکایەتی پەرلەمان و کشیانەوی یەکێتی.. واشنتۆن پەیامیگ ئەرا هێزە کوردەیل کل کەێد

شەفەق نیوز - واشنتن

مستەفا هاشم

وەزارەت دەیشت ئەمریکی، رووژ شەممە، دووپات لەبان پاڵپشتی واشنتۆن ئەرا هەرێم کوردستانیگ وەتوانا کرد، و وە ئەوە وەسفی کرد کە پایەیگ بنەڕەتییە ئەرا پەیوەندییەیل لە ناوەین وڵاتەیل یەکگرتگ و عراق، لە وەختیگ بانگەواز ئەرا لایەنە سیاسییەیل لەناو هەرێمەگە کرد ئەرا کارکردن وە شیوەیگ بیناکەر ئەرا هازدارکردن دامەزراوەیلی، لەبان بنەمای ئەو وەرەونواچگنە دۊاییەیلە کە پەرلەمان کوردستان وەخوەی دی و فرەترەوبۊن ناکۆکییەیل لە ناوەین هەردوگ پارتە سەرەکییەگە.

 هەڵوێست ئەمریکی لە وەڵامیگ تایبەت ئەرا قسەکەروە وەزارەت دەیشت هات لەبان پرسیاریگ کە ئاژانس شەفەق نیوز لەلی کردۊد لەباوەت هەڵوژاردن دەسەی سەرۆکایەتی پەرلەمان کوردستان دۊای نزیکەی دوو ساڵ لە گیرخواردن سیاسی، و ئەوەگ دۊای ئەوە هات لە گرژییەیل و بایکۆتکردن دانیشتنەگە لەلایەن یەکێتی نیشتمانی کوردستانەو، و راگەیانن کشیانەوەی لە حکومەت هەرێم.

قسەکەرەگە وت: "وڵاتەیل یەکگرتگ پاڵپشتی لە هەرێم کوردستان عراقیگ وەتوانا لەبان خوەیڕاگردن کەێد، کە وە پایەیگ بنەڕەتی مینێد ئەرا پەیوەندییە فراوانەگە لە ناوەین وڵاتەیل یەکگرتگ و عراق".

دیاری کرد: "گاڵ گشت لایەنەیل دەیمن تا زویوەزوی و وە شیوەیگ بیناکەر لەبان ئەو پرسەیلە کار بکەن کە شایەت دامەزراوەیل هەرێم کوردستان هازدار بکەن".

قسەکەرەگە دووپات کرد لەبان ئەوە کە "وڵاتەیل یەکگرتگ پابەندە وەرانوەر هاوبەشەیلی لە گشت ناوچەیل عراق کە کار کەن ئەرا بیناکردن دەوڵەتیگ خاوەن سەروەرییگ راسگانی و ئارام و پیشکەفتگ".

 ئی هەڵوێست ئەمریکییە دۊای دەسکردن پەرلەمان هەرێم کوردستان ئەرا کارەیلی تیەێد، لە رووژ چوارشەممە چوارەم لە تشرین دۊەم/ نۆڤەمبەر ئیسە، و هەڵوژاردن دەسەی سەرۆکایەتیی وە ئامادەبۊن 52 پەرلەمانتار لە بنەڕەت 100، کە ڤالا فەرید، کاندید پارت دیموکرات کوردستان، ئەرا سەرۆکایەتی پەرلەمان هەڵوژریا، و رامی نووری، نۊنەر پێکهاتەی مەسیحی، ئەرا جیگر سەرۆک، و مونا قەهوەچی، نۊنەر پێکهاتەی تورکمان، جۊر سکرتێر پەرلەمانەگە.

 دانیشتنەگە لە ناوڕاس بایکۆتیگ فەرمی لەلایەن یەکێتی نیشتمانی کوردستان و نەوەی نوێ و هێزە سیاسییەیل ترەک وەڕیەو چگ، لە وەختیگ پارت دیموکرات دووارە کاراکردن دامەزراوەی یاسادانانەگە وە گامیگ هەوەجەدار ئەرا پاراستن قەوارەی دەستووری هەرێم و دواییهاوردن وە رەوش پەکخستنەگە لەقەڵەم دا.

 پەرلەمانەگە چگۊدە ناو رەوشیگ لە گیرخواردن لەوەردەم ئەو هەڵوژاردنەیلە کە لە 20 تشرین یەکەم/ ئۆکتۆبەر 2024 وەڕیەو چگۊن، کە پارت دیموکرات کوردستان وە 39 کورسی کەفتە نوای دەرەنجامەیلی، و دۊای ئەوەیش یەکێتی نیشتمانی وە 23 کورسی هات، و نەوەی نوێ وە 15 کورسی، وەرجە ئەوەگ ناکۆکییەیل لەباوەت دروسکردن حکومەت و بەشەوکردن پۆستەیل ریگری بکەن لە تەواوکردن هەڵوژاردن دەسەی سەرۆکایەتیی دۊای یەکەم دانیشتنی لە کانوون یەکەم/ دیسەمبەر لە خود ساڵ.

 قەیرانەگە فرەترەو بۊ دۊای هەڵوژاردن دەسەی سەرۆکایەتیە نووەگە، کە سەرۆک یەکێتی نیشتمانی کوردستان، بافڵ تاڵەبانی، رووژ پەنجشەممە، بڕیار پارتەگەی ئاشکرا کرد ئەرا کشیانەوە لە حکومەت هەرێم و داننەنیان وە دانیشتنە پەرلەمانییەگە یا دەرەنجامەیلی، وە هەژمارکردن ئەوە کە ئەو ریکارەیل گیریاسە وەر پشت وە رێککەفتنیگ سیاسی راسگانی نییەوەسن.