وەرگری شارستانی دویاترین تەرم لەژیر رمیاگ بیناگەی ناوڕاس بەغداد درارێد
شەفەق نیوز/ تیمەیل وەرگری شارستانی، ئمڕوو سێشەممە، توەنستن دویاترین تەرم لەژیر رمیاگ بینای تاقیگەی نیشتمانی لە ناوڕاس بەغداد درارن، ک تەرم پیاویگ بوی، وەیەوە کۆتایی وەکارەیل مینەکردن تەڕ قوربانیەیل تیەێد ک نزیکەی چوار رووژ وەپی چگ.
سەرچەوەیگ ئەمنی ئەرا ئاژانس شەفەق نیوز وت: تیمەیل وەرگری شارستانی دویاترین تەرم پیاویگ لەژیر رمیاگ بینای تاقیگەی نیشتمانی لە مەیدان واسق لە ناوچەی کەرادەی ناوڕاس بەغداد درارن.
سەرچەوەگە وتیش: ئامار کارەیل مینەکردن ک ئمڕوو وە فەرمی تەواو بوی دویای چوار رووژ لە مینەکردن وەردەوام لە یەک تەشرین یەکەم تا ئمڕوو رەسیە ٤ تەرم، و ١٣ کەسیش لەژیر رمیایەگە رزگار کریان.
لەلای خوەییش، وەڕێەوبەرایەتی وەرگری شارستانی دووپات کرد لە کۆتاییهاوردن وە مینەکردن ورزگارکردن سەردانکەرەیل گیرهاتگ لەژیر رمیاگ بینای تاقیگەی نیشتمانی چوار قاتی لەناوچەی کەرادەی ناوڕاس بەغداد.
وەڕیەوبەرایەتیەگە لە بەیاننامەیگ ئمڕوو دیاری کرد ک کارەیلیان نزیکەی ٧٥ ساعەت وەردەوام رووژ وشەو وەبی هوچان لەلایەن تیمەیل رزگارکردن شارستانی لە بەغداد وە هەردوگ لای کەرخ ورەسافەی وەپی چگ، وە هاوردن ئامیرەیل رزگارکردن سەنگین وسووک و تەقەلای پشتگیریکردن وە فەرماندەیی وەڕیەوبەر گشتی وەرگری شارستانی لیوا کازم بۆهان.
کارەیل مینەکردن مردگەیل وەبی هوچان وەردەوام بوی، ک رەسیە دراوردن تەرم پاسەوان بیناگە یەکەم جار دویای ٢٩ ساعەت لە کار لە وەخت رمیانەگە، و کارەیل مینەکردن و دراوردن تەرم داڵگ ومناڵەگە نزیکەی ٧٠ ساعەت کیشا، و دویاتریان دراوردن تەرم پیاو پیریگ دویای ٧٥ ساعەت، لەوەر گەپی پارچەیل کۆنکرێتی وە رمیان قاتەیل بیناگە وەبان یەک.
