دراوردن تەرم مناڵیگ و داڵگی لەژیر رمیاگ بینای واسق لە بەغداد
2022-10-04T06:53:08+00:00
شەفەق نیوز/ وەڕێەوبەرایەتی وەرگری شارستانی، ئمڕوو سێشەممە، ئەرا ئاژانس شەفەق نیوز وت: تیمەیلی توەنستن تەرم مناڵیگ وەگەرد تەرم داڵگی لەژیر رمیاگ بینای تاقیگەی نیشتمانی لە مەیدان واسق لە ناوچەی کەرادەی ناوڕاس بەغداد درارن.
وەڕێەوبەرایەتیەگە وتیش: کار ئەرا دراوردن تەرمیگ تر وەردەوامە ک هیمان لەژیر مەنیە.
وەرجەیە، عەمید جەودەت عەبدولڕەحمان ئەرا ئاژانس شەفەق نیوز وت: ٧٥% لە رمیاگ بیناگە لاوریا و ٢٥%ی مەنیە.
مەوقەی رمیان بیناگە لە رووژ شەممەی گوزەشتە، کازم بۆهان وەڕیەوبەر وەرگری شارستانی وت: ١٨ کەس مەوقەی رمیانی لەناو بیناگە بوینە، ک ١٣ کەس دەسوەجی رزگار کریان، وبیناگە چوار قاتیە، وەتەواوی رمیا.
