ماکڕۆن: دەرفەتیگ تەڵایی لە نوای هەولێر و بەغداد هەس
شەفەق نیوز/ ئیمانوێل ماکڕۆن سەرۆک فەڕەنسا، ئمڕوو یەکشەممە، باس پەیوەندیەیل ئیسەی ناوبەین حکومەت فیدڕاڵی و حکومەت هەرێم کوردستان وە فرە خاس کرد.
ئەوەیش لە وتاریگ ئەرا رووژنامەنووسەیل لە مەوقەی سەردان شار مووسڵ بوی ک وت: وەرپرسایەتی هالە بان گەردنمان وە ئاوەدانکردنەوەی عراق و وەردەوامی لە جەنگ دژوە تیرۆر، و دابینکردن خزمەتگوزاری جوور پەروەردە و کەرتەیلیگ تر، و هەمیش وەرد ئەو پێکهاتەیلە ئەرا جیوەجیکردن ئەنجامەیلە کار بکەیمن.
دەربارەی سەردانەگەی ئەرا هەرێم کوردستان، سەرۆک فەڕەنسا وت: هەنای پەیوەندی ناوبەین حکومەت فیدڕاڵی و حکومەت هەرێم لە ساڵ ٢٠١٧ ئاڵووز بوی، فەڕەنسا کار ئەرا گونجانن کەشەوهەوای ناوبەینیان کرد، و جەخت کرد ک بایەتە دووارە رەوشەیلە لەناوبەین گشت پێکهاتەیلە عراق بگونجیەن.
وتیش؛ دەرفەتیگ تەڵایی لەنوای حکومەت هەرێم کوردستان و حکومەت فیدڕاڵی ئەرا خاسەوکردن رەوشەیل ناوبەینیان هەس، ودیاری کرد ک رەوشەیل ئیسەی ناوبەینیان فرە خاسە.
وتیش؛ بتەوکردن پەیوەندیەیل ناوبەین هەولێر و بەغداد فرە گرنگە، و کار ئەرا چەسپانن ئاسایش و ئارامی و یەکقبووڵکردن لە عراق کەیمن، و دووپات کرد ک چەوپیکەفتنەگەی وەرد نێچیروان بارزانی سەرۆک هەرێم کوردستان بەرهەمدار بوی.
دەربارەی رەوش ئاوارەیل ئەیزیدی ماکڕۆن وت: فرەی ئی ئاوارەیلە هانە هەولێر و دهۆک، و بایەتە کەشوهەوای گونجیاگ دابین بکەیمن تا وەرەو میلکان خوەیان گلەو بخوەن.
