میسان: لافاوەیل ئیران وە تەکان ٤٠٠ مەتر/ چرکە هاتنە ناو عراق.. ڤیدیۆ
عەلا ساعدی وەڕیەوبەر سامانەیل ئاوی لە میسان ئەرا ئاژانس شەفەق نیوز وت: ئاست ئەو لافاوەیلە ک لە ئیران لەبان جوو شماشیر باکووری لە قەزای عەلی عەربی هاتنە رەسیە ٢٠ تا ٢٥ مەتر شەشپاڵوو لە چرکەیگ، وتیش: شماشیر یەکەمین پەلە لەناو سێ پەل ک لافاو لە لایەن ئیران وەناویان تیەێد، ک چەم تیب و دوێریج نزیکەی ٢٠٠ مەتر شەشپاڵوو لە چرکەیگ وەناویان هات.
وتیش: ئەوەسا ئاو شماشیر روی وەرەو چەم دیجلە کەێد، و ئاو چەم تیب و دوێریج چوودە ناو خۆر سناف، ک ئومێد هەست لەی دوو چەمە پڕ بوود تا ئاوە زیایەگە بخریەێدە بان چەمەیل ناوڕاس.
ساعدی مەزەنە کرد لافاوەیل نوویگ لەلایەن ئیران لەی رووژەیل بابانە باێد، و دووپات کرد ک کارەگە هاژیر کۆنتڕۆڵ، و ئیسە کار ئەرا رەدکردن تەکان لافاوەیل وەناو جووەیل خوەیان کریەێد.
لەلای خوەییش، حکومەت پارێزگای واست، ئمڕوو یەکشەممە، هەڵوێست ئەو لافاوەیلە دیاری کرد ک وەلایەن ئیران هاتنە.
سەمیر مەگسوسی ئەندام شانەی قەیران ئەرا ئاژانس شەفەق نیوز وت: ئەو لافاوەیلە ک لە ئیران هاتنە هازەگەی ٤٠٠ مەتر لە چرکەیگ بوی، باوجی لافاو رخبەریگ نییە، و وڵاوە بویە ناو چەمەیل دەورگرد پارێزگاگە، وتیش: لایەن ئیران تا گشت ئەمارەیل خوەی پڕ نەکەێد نیەیلێد ئاوەگە بڕەسێدە عراق.
وتیش: مەزەنەی نشان هاتن لافاوەیل نوویگ دەن ک لە سوو دووشەممە دەسوەپی کەێد، و ئامادەباشی لە بەشیگ لە ناوچەیل سنووری کریاگە وە دروسکردن تەیمانەی خوەڵ لەنوای هەر لافاو رخبەریگ.
