پەلاماریگ چەکدار لەبان دیوەخان هووزیگ لە زیقار
٠
2021-10-18T10:49:57+00:00
شەفەق نيوز/ سەرچەوەیگ ئەمنی لە زیقار، ئمڕوو دووشەممە، خەوەردا ک چەکدارەیلیگ تەقە لە دیوەخان یەکیگ لە گەورەیل هووز ئال زێرج لە باکوور پارێزگاگە کردن.
سەرچەوەگە ئەرا ئاژانس شەفەق نیوز وت: چەکدارەیلیگ، شەوەکی ئمڕوو، تەقە لە دیوەخان شێخ حسێن ئزێرجاوی کردن، لەوەر گرفتەیلیگ لەبان وەرگردن سەرۆکایەتی هووزەگە.
سەرچەوەگە دیاری کرد ک ئەو کەسە ک پەلامارەگە لەبانی کریا، هالە پۆست وەڕیەوبەر کارت نیشتمانی لە ناحیەی ئوور.
وتیش: پەلامارەگە تەنیا زەرەدەیل سووکیگ لە رۊی دیوەخانەگە کرد، و چەکدارەیلە وەرەو شۊن نادیاریگ واین.
