گلەوخواردن واران و هەڵسان خوەڵوتووز.. کەشوهەوای عراق تا کۆتایی هەفتە

گلەوخواردن واران و هەڵسان خوەڵوتووز.. کەشوهەوای عراق تا کۆتایی هەفتە
2023-05-21T10:51:12+00:00

شەفەق نیوز/ دەسەی کەشناسی عراق، ئمڕوو یەکشەممە، مەزەنەی کەشوهەوای ئی چوار رووژ بانانە بڵاو کرد، و باس واران و خوەڵوتووز لە کۆتایی هەفتە کرد.

دەسەگە لە بەیاننامەیگ رەسیە ئاژانس شەفەق نیوز: کەشوهەوای سوو دووشەممە، لەناوچەی ناوڕاس رووشنە و بوودە نیمچە ئەور،و پلەی گەرمی چەن پلەیگ بەرزەو بوود، و لە ناوچەی باکوور نیمچە ئەورە، و پلەی گەرمی کەمیگ بەرزەو بوود، و لە ناوچەی باشوور رووشنە وەگەرد لەکە ئەوریگ، و پلەی گەرمی نزیک رووژ وەرجە خوەیە.

 بەیاننامەگە وتیش؛ رووژ سێشەممە، لەناوچەی ناوڕاس نیمچە ئەورە، و لە ناوچەی باکوور نیمچە ئەورە وەگەرد دەرفەت واران سووکیگ دویای نیمەڕو، و لە ناوچەی باشوور رووشنە وەگەرد لەکە ئەوریگ، و پلەی گەرمی لە گشت وڵاتەگە کەمیگ بەرزەو بوود.

 وتیش: رووژ چوارشەممە، لە ناوچەیل ناوڕاس و باکوور نیمچە ئەورە وەگەرد خوەڵوتووز سووکیگ، و لە ناوچەی باشوور نیمچە ئەورە و جاروباریش ئەور تەواوە وەگەرد نمە وارانیگ لە بەشەیل خوەرئاوای دویای نیمەڕو، و پلەی گەرمی لە گشت وڵاتەگە نزیک رووژ وەرجە خوەیە.

 بەیاننامەگە وتیش؛ کەشوهەوای رووژ پەنجشەممەی ئایندە، لە ناوچەیل ناوڕاس و باشوور نیمچە ئەورە و جاروباریش ئەور تەواوە وەگەرد وارانیگ جیاجیا لە مەوقەی شەوەکی، و لە ناوچەی باکوور نیمچە ئەورە و جاروباریش ئەور تەواوە وەگەرد دەرفەت واران لە بەشەیل خوەرھەڵاتی مەوقەی رووژ، و پلەی گەرمی لە بەشەیل ناوڕاس و باشوور کەمیگ داوەزێد، و لە ناوچەی باکوور نزیک رووژ وەرجە خوەیە.

  

Shafaq Live
Shafaq Live