لەبان کراگە.. سواریگ لە باشوور عراق رانندەی تەکسی کوشێد
2021-11-18T12:23:40+00:00
شەفەق نیوز/ سەرچەوەیگ ئەمنی لە پارێزگای زیقار، ئمڕوو پەنجشەممە خەوەردا لە کوشیان رانندەی تەکسییگ لەناوڕاس شار ناسریە.
سەرچەوەگە ئەرا ئاژانس شەفەق نیوز وت: مرافەیگ لە ناوچەی ئەریدۆ ناوڕاس شار ناسریە کەفتە ناوبەین رانندەی تەکسییگ و سواریگ، رەسیە ئەوە ک سوارەگە چەقو دالە مل رانەندەگە و کوشتەی.
سەرچەوەگە وتیش: سوارەگە وەرەو شۊن نادیاریگ وای، و هێزیگ ئەمنی تەرمەگە رەسانە بزشک دادوەری.
