کەشوهەوای عراق.. تاوسان وەرجەوەخت و هاتێ لە جەژن واران بوارێد
2024-03-31T06:47:31+00:00
شەفەق نیوز/ نەخشەیل کەشوهەوای عراق، نشان دەن کە کەمکەم گەرمی چوودە بان، لە وەختیگ گشت پارێزگایل وڵاتەگە چەوری وارانیگ وەگەرد جەژن رەمەزان کەن، کە دویای دە رووژ ترە.
لە ئمڕوو یەکشەممەور پلەی گەرمی دەسکێدە بەرزەوبوین لە گشت شارەیل وڵات، و لە رووژەیل هەفتەگە وەردەوام بوود لە بەرزەوبوین.
مەزەنە کریەێد لویتکەی بەرزەوبوین گەرمی بکەفێدە جمعە و شەممە، کە لە بەغداد و شارەیل ناوڕاس و باشوور رەسێدە دویادویای سیەیل.
ئی بەرزەوبوینە کەشوهەوای نیمچە تاوساننی نشان دەێد.
لە باوەت دەرفەت واران، لەی هەفتە لە گشت شارەیل وڵاتەگە واران لەناو مەزەنەی کەشوهەوا نییە.
وەگورەی مەزەنەی دویر، نشانەیگ ئەرا واران وەرجە جەژن رەمەزان یا لە یەکەم رووژ جەژن هەس، کە هاتێ واران رفتیگ بوارێد.
