کشتوکاڵی عراق: زیاتر لە ١٥ ملیار دار خوازیمن تا لە بیاوانی قورتار بۊمن
شەفەق نیوز/ وەزارەت کشتوکاڵی عراق، ئمڕوو سێشەممە، وڵاتەگە زیاتر لە ١٥ ملیار دار خوازێد تا سیمای بیاوانی لەناو بەێد و نوای گەردەلۊل خوەڵوتوز بگرێد، و دووپات کرد ک ئەرا رەسین وەی ئامانجە چنین گشت لایەنەیل پەیوەندیدار وەیەکەو خوازێد.
حەمید نایف قسەکەر وەزارەتەگە ئەرا ئاژانس شەفەق نیوز وت: گەردەلۊل خوەڵوتوز ک عراق گرێدە وەر لەوەر کەم وارانی و کەمەوبۊن پووشان درەختی لە زەۊەیل عراق هاتیە، هەمیش وەگەرد کەمی ئەو زەۊەیل کشتوکاڵیە، و گشت یانە بوونە هووکار خوەڵوتوز.
وتیش: ئەو دەورگری سەوزە و شارە سەوزەیل بەغداد پایتەخت لە کار ئەمانەت بەغدادە، و لەو پارێزگایلە کار حکومەتەیل خۆجێییە.
و دووپات کرد ک وەزارەت کشتوکاڵی پشتگیری لە دروسکردن دەورگیری سەوز ئەرا بەغداد و پارێزگایل کەێد وە دابینکردن دارەیل تەمەن درۊژ وە پەتی، و هەڵمەتیگیش لەلایەن ئەنجومەن وەزیرەیل هەس وە هاوکاری ریخریاگەیل کۆمەڵگای شارستانی ئەرا دارناین لە شۊنە سەوزەیل.
نایف دیاری کرد ک ئیسە کار لە دارناین تەنیا لە زانکۆ و جادەیل سەرکی کریەێد، لە وەختیگ ئیمە بەرنامەیگ نیشتمانی خوازیمن ئەرا دارناین لە عراق، ک لە پارێزگایلە وەرەو بیاوان دەسوەپی کەێد، و توەنیمن دارخورما و فستق و زەیتون بنەیمن، ک ئی دارەیلە سوود دارایی دیرێد، و خوەڵەگە چەسپنێد و کەشوهەوا پاکەو کەێد.
وتیش: وەگورەی مەزەنەیل عراق ١٥ ملیار و ٢٠٠ مەلیۆن دار خوازێد، و ئی شمارە ئاسان نییە و تەقەلایل وەردەوام خوازێد تا زەۊە هشکەیلە سەوزەو بکریەن.
