كەمەوکردن ئاو فوڕات لەلایەن تورکیا هەڕەشەی کشتوکاڵی و ئاو و کارەبا دەێد
شەفەق نیوز/ تورکیا لە کەمەوکردن بەش سوریا لە ئاو فوڕات لە تاوسان ٢٠٢٠ تا ئیسە وەردەوامە، ک لەی دویاییە بویە هووکار خراوبوین بەرهەمەیل کشتوکاڵی و بڕین کارەبا لە ناوچەیلیگ لە حەسەکە و دێر زۆر.
وەگورەی رێککەفتن ناوبەین دیمەشق و ئەنقەرە لە ساڵ ١٩٨٧، بەش سوریا لە تەکان ئاو فوڕات لە تورکیا رەسێدە ٥٠٠ مەتر شەشپاڵو لە چرکەیگ، وە ئەندازەی ٢٥٠٠ بەرمیلە.
ریاز دەربار هاوسەرۆک ئەنجومەن سوریای دیموکراتی مەسەدە، ئەرا میدیایل راگەیانن نزیک لە ئیدارەی سەروەخوەیی وت: تورکیا ئاو جوور چەکیگ وەکار تیارێد تا ناوچەگە بکەفێدە ژیر دەسی.
دەرار هووشداری کرد ک ئەگەر گیرهاوردن ئاو فوڕات وەردەوام بوود، ئەوەسا داوا لە فەڕەنسا و دەوڵەتە ئەورووپیەکان کەن جەخت لەبان تورکیا بکەن.
سەرچەوەیگ لە بەنداو تەشرین ئەرا ئاژانس شەفەق نیوز وت: کەمەوکردن ئاوەگە لەلایەن تورکیا لە چەن مانگیگ وەردەوامە تا بڕەگەی ئیسە رەسیە ٢٠٠ مەتر شەشپاڵو لە چرکەیگ.
سەرچەوەگە نشان دا ک ئاو ناو بەنداوەیل تەبەقە و تەشرین رخبەرە و نزیکە بوودە هشکییگ هەڕەشەی بەرهەمەیل کشتوکاڵی فراوانیگ دەێد.
و دیاری کرد ک ئیسە تەنیا یەک باڵ ئەرا کارەبای ناوچەیل باکوور خوەرهوڵات سوریا خەنە کار.
دەزگای وزە لە هەرێم فوڕات و جەزیرە راگەیان کەمەوکردن ساعتەیل دابەشکرن کارەبا لەوەر ئەو داوەزین فرە لە ئاست ئاوەگەی فوڕات.
و ئەیە پەنج رووژە کارەبا لە گشت شار حەسەکە و ئاوایەگەی بڕیاگە، لەوەر پەککەفتن باڵەیل بەرهەمکردن کارەبا لە بەنداو تەشرین.
