پسپۆڕیگ کەشناسی هوشداری لە تەم و سەردی دەێد
شەفەق نیوز/ سادق عەتیە پسپۆڕ کەشناسی، ئمڕوو شەممە، وت: وارانەگە تا کۆتایی ئی هەفتە لە عراق وەردەوامە، و هوشداری لە دروسبوین تەمیگ کرد ک فرەی ناوڕاس وڵاتەگە پووشێد، وەگەرد داوەزین پلەی گەرمی.
عەتیە لەنان فەیسبووک نویسان: پەڵەداین ئەورەیل وارانی ئمڕوو لە بەغداد پایتەخت و واست و کەربەلا و نەجەف و بابل و ناوچەیلیگ لە بەسرە و زیقار و سەماوە و خوەرهەڵات ئەنبار وەردەوامە، ودیاری کرد ک ئەرا شەو وارانەگە وسیەێدەو، و ئەورەگە لە شارەیل باشوور و ناوڕاس وڵاتەگە وەگەرد نمە وارانیگ مینێد.
وتیش: رووژەگەی سوو یەکشەممە، کەشوهەوا ئارامە و واگە باکووری خوەرئاواییە، وەگەرد داوەزین کەمیگ لە گەرمی، و ئەرا شەو یەکشەممە و رووژ دووشەممە لە بیاوان باشوور و خوەرئاوای بەسرە دەرفەت پرزە وارانیگ پەیا بوود.
عەتیە وتیش: رووژ سێشەممە، کەشوهەوا ئارامە وەگەرد پەڵەی ئەور و دەرفەت پرزە وارانیگ لە ناوچەیلیگ لە ئەنبار، و رووژ چوارشەممە بوودە واران نوویگ لە فرەی شارەیل، وەلی کەمیگ سووکتر و تا رووژ پەنجشەممە و لە رووژ جمعە تەواو بوود ، و هاتێ لە ناوچەیلیگ جیاجیا لە رووژ شەممەی ئایندە بوارێد.
عەتیە وتیش: هوشداری لە ئمشەو و شەفەق یەکشەمە لە دروسبوین تەم کەیمن ک فرەی شارەیل ناوڕاس وڵاتەگە پووشێد جویر سەڵاحەدین و بەغداد و هەمیش لە شارەیل فورات ناوراس ک ئاسر نووڕینی فرە کەمەو کەێد، و ئەرا شەفەق رەسێدە سەماوە و زیقار.
عەتیە هەمیش هوشداری لە سەردی مەوقەی شەو کرد، وەتایبەت لە ناوڕاس و خوەرئاوا و باکوور وڵاتەگە.
