ديالە.. توومارکردن تویشهاتن نوویگ وە تەو خوینوەربوین
2023-09-06T12:00:55+00:00
شەفەق نیوز/ خەسەخانەی ڤیتێرنەری لە دیالە، ئمڕوو چوارشەممە، تویشهاتن نوویگ وە تەو خوینوەربوین خوەرهەڵات بەعقووبە راگەیان، تا شمارەی بیمارەیل ئمساڵ بڕەسێدە ١٥ کەس.
ئیبنسام جاسم محمد خانمە وەڕیەوبەر خەسەخانەگە ئەرا ئاژانس شەفەق نیوز وت: گەنجیگ لە تەمەن ٢٣ ساڵان لە ناوچەی عتبە لە قەزای بەلەدروز تویش تەو خوینوەربوین هات، و دیاری کرد کە بیمارەگە وڵاخ ئیوەت کەێد.
وتیش: ریکارەیل ڤیتێرنەری لە دەورگرد وشوین تویشهاتنەگە جیوەجی کریا، وەگەرد قەیەغەکردن جموجویل وڵاخەیل لە شوین تویشهاتنەگە وە هەماهەنگی وەگەرد لایەنەیل تەندروسی.
جی باسە کە دیالە لەی ساڵە دوو مردن وە تەو خوینوەربوین توومار کردیە، یەکیگیان ئەندام بوی لە سوپا لە دەیشت پارێزگاگە تویش هاتوێد، و دویەتیگ لە تەمەن ١٧ ساڵان.
