دەسگیرکردن "دگانکیش" درووکانی دویای ساڵەیلیگ لە کارکردنی لە مووسڵ

شەفەق نیوز/ هیزیگ دەزگای ئاسایش نشتمانی لە نەینەوا، ئمڕوو پەنجشەممە، کابرایگ دەسگیر کرد، خوەی کردیەسە پزشک دگان لە شار مووسڵ.   

سەرچەوەیگ ئەمنی ئەرا ئاژانس شەفەق نیوز وت: ئەو کابرا ک خوەی کردیەسە پزشک دگان، هاووڵاتییگە خەڵک پارێزگای دهۆک، نووڕینگەی دگان لە مووسڵ واز کردیە، خوەییش مەکتەو سەرەتایی تەواو نەکردیە، ودەرکەفت ک یە چەن ساڵیگە نووڕینگە واز کردیە، وئەو کەمی چەودیریکردنە و بۆشایی شارەگە دویای ئازادکردنی کردیەسە دەرفەتیگ.  

سەرچەوەگە وتیش: ئاسایش نشتمانی، نووڕینگەی کابرا وە مووم بەسا، و قسەیل تاوانبارەگە واژوو کرد، تا هەواڵەی دادگا بکەێد، وتیش: توومەتبارەگە زانیاری لەبان ئەنتەرنێت گردەو کردیاد، و کار دگان کیشانن وپڕەوکردن کردیاد.