دەسگیرکردن چەتەی هووشبەرەگان و دەسوەبانان چەکەیلیگ لە بەغداد
شەفەق نیوز/ وەزارت ناوخۆی عراق، ئمڕوو دووشەممە، راگەیان دەسگیرکردن چەتەیگ بازرگانی هووشبەرەگان کەێد، و توومەتبارەیلیگ تر وە کوشتن و دزیکردن، هەمیش دەسنابان جووراجور چەکەیلیگ، لەناوچەیلیگ جووراجور لە بەغداد پایتەخت.
وەزارەتەگە لەبەیانامەیگ رەسیە ئاژانس شەفەق نیوز وت: مەفرەزیل نووسینگەی دژە تاوان باب شێخ، دوو توومەتبار دەسگیر کردن دویای رەسین زانیاریەیلیگ لە جیوەجیکردن تاوان کوشتن کەسیک وە گولەی دەوانچەیگ لە سەری، لە ناوچەی فەزڵ لە بەغداد ساڵ ٢٠١٧.
و دیاری کرد ک توومەتبارەگان تاوان خوەیان ئاشکرا کردن و قسەیلیان واژوو کریا و وەگورەی فەرمانەیل مادەی ٤٠٦ بەندین کریان.
و ئاماژە کرد ک مەفرەزیل نووسینگەی دژە تاوان بەیاع توومەتباریگ دەسگیر کردن بایی ٢٠ هەزار دۆلار لە ماڵ هاووڵاتییگ دزی کردگە، وتوومەتبارەگە بەندین کریا وریکارە یاساییەگان وەگورەی مادەی ٤٤٤ وەدژی بریا.
لە چینیگ هاوشیوە، مەفرەزیل وەڕێۆبەرایەتی هەواڵگری بەغداد دەسگیر چەتەیگ لە سێ کەس کردن، بازرگانی وە هووشبەرەگان کەن، و لەلایان دەسنریا بان بڕیگ لە حەپ و مادە هووشبەرەگان و چشتەیلیگ تر ئەرا هووشبردن وەکار تیەن، ئەوەیش لەناو ماتۆڕسکڵ توکتوک خوەیان.
وتیش: مەفرەزیل هەواڵگری لە هەڵمەت دەسناین لەبان چەک بی مووڵەت ئۆپراسیۆنیگ ئەمنی لە باشوور بەغداد جیوەجی کردن، بوویە هووکار دەسناین لەبان سێ چەک کلاشینکۆف و دوو دەوانچە وەگەرد گولەگانیان.
