خوەڵوتوز و واران و داوەزین گەرمی لە عراق
شەفەق نیوز/ دوو شارەزای کەشناسی مەزەنە کردن گەردەلۊلیگ خوەڵوتوز سوو دووشەممە فرەی ناوچەیل عراق بگرێدە وەر، و هەرێم کوردستانیش وەگەردیان، وەگەرد داوەزین لە پلەی گەرمی، و ئەگەر واران لە ناوچە کویەیلە لە پارێزگای هەولێر و دهۆک.
عەلی جابر زیادی پسپۆڕ کەشناسی ئەرا ئاژانس شەفەق نیوز وت: خوەڵوتوز نوویگ مەزەنە هەس ئەمشەو بەێد لە وڵاتەگە، ئیوارە لە باکوور سوریا دەوس بوود، و یەکەم ساعەتەیل شەو لە وڵاتەگە قویلەو بوود، وتیش؛ خوەڵوتوزەگە رەسێدە بەغداد وشارەیل ناوڕاس دویای نیمەی شەو و شەفەق سوو دووشەممە.
وتیش: شەوەکی سوو خوەڵوتوزەگە فراوانەو بوود وەرەو ناوچەیل باشوور و مەزەنە هەس خەس بوود و ئاست نووڕستن ئاسۆیی ئەرا ٣٠٠ مەتر کەمەو بکەێد، و هوشداری دادە رانندەیل ریەیل دەیشتەکی و بیمارەیل رەبو.
زیادی هەمیش مەزەنسی داوەزین گەورەیگ لە پلەی گەرمی ئەرا سوو دووشەممە کرد.
لەلای خوەییش، ئاراس جەبار پسپۆڕ کەشناسی ک لە ئاست هەرێم کوردستان ناسریاگە لە بەیاننامیگ وت: سوو دووشەممە لە یەکەم ساعەتەیل شەوەکی خوەڵوتوز خەسیگ فرەی ناوچەیل هەرێم کوردستان پووشێد، و فرەگەی کەفێدە بان پارێزگای کەرکوک و ئیدارەی گەرمیان، وتیش: ئەرا ئیوارە کەمەو بوود، و شەوەکی سێشەممە تەواو بوود.
وتیش: سوو دووشەممە ئەگەریگ ئەدا واران کەمیگ لە شەوەکی هەس لە بەشەیلیگ لە ناوچەیل کویە لە پارێزگای دهۆک و هەولێر.
جەبار وتیش: گەرمیەگە نزیکەی ٥-٧ پلەی سەدی وەگورەی ئمڕوو داوەزێد.
