٢٠٠٠ تاسیان وە خوەڵوتوزەگە لە عراق

شەفەق نیوز/ وەزارەت تەندروسی و ژینگەی عراق، ئمڕوو دووشەممە، توومارکردن دوو هەزار تاسیان لەوەر خوەڵوتوزەگە راگەیان ک شەفەق ئمڕوو وڵاتەگە گردە وەر.  

سەیف بەدر قسەکەر وەزارەتەگە لە بەیاننامیگ رەسیە ئاژانس شەفەق نیوز وت: دامەزراوەیل تەندروسی لەلای کەمەو ٢٠٠٠ تویشهاتن وە تاسیان لەوەر خوەڵوتوزەگە وەرگردنە، و تا ئیسە هویچ مردنیگ توومار نەکریا.  

بەدر داوا لەوانەگ بیماری هەناسە و دڵ دیرن و گەورە تەمەنەیل کرد لەماڵ دەرنەچن، و هەمیش باس ئامادەباشی گشت دامەزراوەیل تەندروسی کرد.  

بەدر دووپات کرد ک گشت دەرمان و خوازینەیل پزشکی و ئۆکسجین لە گشت دامەزراوەیل وەزارەتەگە لە بەغداد و پارێزگاریل دابین کریاگە.