وینە..تاسیان سەدان کەس لەوەر خوەڵوارین لە عراق

شەفەق نیوز/ خەسخانەیل عراق، شەوەکی ئمڕوو دوشەممە، سەدان پسای تاسیان گردنە خوەیان لەوەر ئەو گەردەلویل خوەڵوارانە لە دویەشەو وڵاتەگە پووشیە. 

خەسخانەیل بەغدای پایتەخت دەیان تاسیان وەرگردن، لەهەمان وەخت تیمەیل فریاگوزاری سەر وە وەڕێەوبەرایەتی مەدەنی لە جادەیلە بڵاوەو کریانە.   

وەڕێەوبەرایەتیەگە لە بەیاننامیگ رەسیە ئاژانس شەفەق نیوز وت، " مەفرەزەیگ لە وەڕێەوبەرایەتی وەرگیری شارستانی بەغدا وە نوێنەرایەتی مەفرەزەیل بوژانەوە دەسکردنە وە گەردین لە جادەیل گشتی و ناوچەیل نیشتەجیبوین و بازاڕ و شوینەیلتر ک هاوڵاتیەیل چن ئەرای و وەپای رێنمایەیل بارگەی گشتی خزمەتگوزاری بوژانەوە وە هاوڵاتیەل پێشکەش کەن. 

لەهەمان وەخت، سەرچەوەیگ پزشکی لە نەجەف وە ئاژانس شەفەق نیوز وت"لە ئاماریگ سەرەتایی لە پارێزگاگە نزیکەی 160 تاسیان توومارکریایە". 

وتیش، " لە3 خەسخانەی پارێزگاگە نزیکەی 160 تاسیان لەوەر گەردەلویل خوەڵوارانەگە توومارکریایە". 

دیاریکرد" هاتێ لە پارێزگاگە 400 تاسیان رەدبوود  لە دویای تەوابوین ئامار نوو خەسخانەیل پارێزگاگە. 

تەندروسی کەربەلا، 156 تاسیان توومارکرد  و خەسخانەیل ئەنبار نزیکەی 50 خنکیان.

سەرچەوەیگ پزشکی لە ئەنبار وە ئاژانس شەفەق نیوز وت،" خەسخانەی ژن و مناڵەیل فێرکاری فەلوجە 5 تاسیان گردە خوەی و خەسخانەی عامریە دو تاسیان". 

وەگورەی سەرچەوەگە، خەسخانەی گشتی هیت 13 تاسیان توومارکرد.

خەسخانەی ژن و مناڵەیل هووکارەیی رەمادی  3 تاسیان روی لەلی کرد و خەسخانەی هووکارەیی رمادی یەک تاسیان، و خەسحانەی هووکارەیی فەلوجە 23 تاسیان توومارکردن.