بارزانی: بایەدە بەغداد پابەندیەگانی وەرانوەر مافەیل هەرێم کوردستان جیوەجی بکەێد
شەفەق نیوز/ مەسرور بارزانی سەرۆک حکومەت هەرێم کوردستان، ئمڕوو سێشەممە، چەویکەفتە جیمس کلیڤری وەزیر دەوڵەت بریتانیا ئەرا باوەتەیل خوەرهەڵات ناوڕاس وباکوور ئەفریقا، و جیمس هیبی وەزیر هێزە چەکدارەگان بریتانیا، وستیڤن هیکی باڵوێز بریتانیا لە عراق.
بەیاننامەی حکومەت هەرێم وت: لە کۆبونەوەگە باس لە شیوەیل بتەوکردن پەیوەندیەگان لەناوبەین هەرێم کوردستان و بریتانیا کریا.
وشاندە بریتانیەگە ئاماژە کرد ک بریتانیەگان وە گشت رێزیگ نووڕنە قوربانیکردنەگان هێزەیل پێشمەرگە و نواگردن تیرۆر، و هەمیش شاندەگە نیشان ئامادەبوون بریتانیا دا ئەرا پاڵپشتیکردن ئاسۆیل هاوکاری وەگەرد هەرێم لە گشت چینەگان، وەتایبەت لە چین بازرگانی و زیایکردن بەرهەمهاوردن لە هەرێم کوردستان.
سەرۆک حکومەت سوپاس خوەی ئەرا بریتانیا ئاڕاستە کرد و ئەرا دەورەگەی لە دەسمیەت هەرێم کوردستان، وهەمیش رووشنایی خستە بان پەیوەندیەگان لەناوبەین هەرێم کوردستان و حکومەت فیدڕاڵی، و دووپاتکرد ک حکومەت هەرێم کوردستان گشت پابەندیە دەستووریەگانی جیوەجی کردگە ئەرا رەسین وە رێککەفتنیگ لە بنەمای دەستور، ئەراوە بایەدە ئەویش پابەندیەگانی وەرانوەر مافەیل و شایستە داراییەگان هەرێم کوردستان جیوەجی بکەێد.
