بەرزەوبۊن نرخ تەڵا لە بازاڕەیل عراق

شەفەق نیوز/ نرخ تەڵای عراقی و  بیگانە لە بازاڕە ناوخۆیەیلە، ئمڕوو یەکشەممە ، 10ی نیسان 2022    بەرزەو بۊ. 

پەیامنێر ئاژانس شەفەق نیوز وت : نرخ فروشتن یەک مسقال تەڵای عەیار 21 خەلیجی و تورکی و ئەوروپی لە بازاڕەیل بڕ فرووشتن لە جادەی نەهر بەغدای پایتەخت، رەسیە 400 هەزار دینار، ونرخ سەنینی رەسیە 396 هەزار، نرخ فروشتن رووژ شەممە  399 هەزار دینار بۊی. 

پەیامنیرمان وتیش: نرخ فروشتن یەک مسقال تەڵای عراقی بەرزەوبۊن وە خوەی دی لە پای 360 هەزار دینار وە نرخ سەنینی رەسیە  356 هەزار دینار. 

لە باوەت نرخ تەڵا لە دوکان زەرەنگەریلە، نرخ فروشتن یەک مسقاڵ تەڵای عەیار 21 خەلیجی ها لە ناوەنی 400 هەزار دینار و 410 هەزار دینار، نرخ تەڵای عراقی ها لە ناوەنی 360 هەزار و 370 هەزار دینار.