بەڵاچە و خنکیان و خوەیکوشتن و پاچینەی بەرزەوکەر.. گیان لەدەسداین 4 کەس وە رۊداوەیل کارەساتبار لە سێ پارێزگا
شەفەق نیوز - پارێزگایەیل
سەرچەوەیگ ئەمنی لە بەغداد، رووژ شەممە، خەوەردا وە گیان لەدەسداین ناخاڵەیگ لەداڵگبۊ 2016 وە رۊداویگ دڵتەزن لە ناوچەی مەهدیە لە دۆرە لە باشوور پایتەخت.
سەرچەوەگە ئەرا ئاژانس شەفەق نیوز دیاری کرد، کە ناخاڵەگە لە دوکان کەرەستەیل بیناسازی کار کردیاد و لە وەخت سەرکەفتنی لە پاچینەی ونج (مەسعەد بەرزەوکەر) لەناو دوکانەگە سەری لەناو (ونجەگە) گیر خواردگە، کە بۊسە هووکار گیان لەدەسداینی دەسوەجێ.
لە رۊداویگ ترەک، سەرچەوەگە خەوەردا لە خوەیکوشتن ناخاڵەیگ لەداڵگبۊ 2014 وە شیوەی خنکانن خوەی وە پەتیگ کە لە قەواسەی ژوورەگەی هەڵواسیاگە لەناو ماڵەگەی خوەی لە ناوچەی باویە لە خوەرهەڵات بەغداد.
سەرچەوەگە دیاری کرد کە کارمەنەیل پۆلیس رەسینەسە شوین رۊداوەگە و تەرمەگە ئەرا پزیشک دادوەری بردنە، و لێکۆڵینەوە واز کردنە ئەرا زانستن چۊنیەتی رۊداوەگە.
لەلایگ ترەکەو سەرچەوەیگ ئەمنی خەوەردا لە مردن گەنجیگ کە تونی تافایی ئاو لە دووڵ عەلی لە ناوچەی بوکەمال سنووری وەرد سووریا بردیەسەی، لە وەخت تەقەلای رەدبۊن لە دووڵەگە وە مەلەوانی.
سەرچەوەگە ئەرا ئاژانس شەفەق نیوز وت، کە گەنجەگە تەقەلا دایە لە دووڵەگە وە مەلەوانی رەد بوود، وەلێ هاز تافاوەگە بردیەسەی، کە بۊسە هووکار گیان لەدەسداینی.
لەی چوارچیوە، وەڕێوەبەرایەتی وەرگری شارستانی بانگەواز لە هاووڵاتییەیل کرد ئەرا خوەیپارێزی، و رخباری نەکردن وە رەدبۊن لە لافاوەیل یا نزیکەوبۊن لە رێڕەوەیلیان، ئەرا دۊرکەفتنەو لە
رۊداەیل هاوشیوە.
لە وەختیگ قسەکەروەناو وەڕێوەبەرایەتی پۆلیس زاخۆ موقەدەم ئەحمەد رەمەزان، خەوەردا لە گیان لەدەسداین هاووڵاتییگ لە دانیشتگەیل شەنگال کە تەمەنی 47 ساڵە، دۊای تویشهاتنی لە تریشقە لە نزیک مەیدان سەنین و فرووشتن ئاژەڵەیل لە زاخۆ.
رەمەزان ئەرا ئاژانس شەفەق نیوز وت، کە هاووڵاتییەگە لە شوینەگە بۊە وە ئەرا بزگیری، وەرجە ئەوەگ تریشقە بەێد لەلی لە وەخت وارانە رفتەیل.
دیاری کرد کە تیمە پسپۆڕەیل رویکردنە شوین رۊداوەگە و تەرمەگە ئەرا پزیشک دادوەری بردن، وە دیاریکردن ئەوە کە وەشکینە سەرەتاییەیل هیچ شوینەواریگ لەبان گیان مردگەگە نیشان نەیانە بیجگە لە سزیان لە خوار پای.
دەسنشان ئەرا ئەوە کرد کە پۆلیس وەردەوامە لە لێکۆڵینەوە لە رۊداوەگە، لەڕی وەدۊاچگن کامێرایەیل چەودیاری و گووشداین وە وتەی وەچەودیەیل ئەرا دڵنیابۊن لە هووکار کووتایی ئەرا گیان مردنی.
