کازمی فەرمان وە گردن هێزیگ ئەمنی دەێد دویای بمباران فڕۆکەی بەغداد
شەفەق نیوز/ فەرماندەی ئۆپراسیۆنە هاوبەشەگان، ئمڕوو دووشەممە، راگەیان کەفتن ٥ قوربانی وزەخمداری دووان لەوەر گورزە مووشەکیەگە ک رەسیە ماڵیگ لە نزیک فڕۆکەخانەی بەغداد، وئاماژەکرد ک موستەفا کازمی فەرماندەی گشتی هێزە چەکدارەگان فەرماندا وە گردن هێزە ئەمنیەگە ک ئەو ناوچە گردگە ک رووداوەگە وەخوەی دی.
فەرماندەگە لە بەیاننامەیگ رەسیە ئاژانس شەفەق نیوز وت: لەو وەختەگ حکومەت و هێزە ئەمنیەگان گشت تەقەلایلیان دەن ئەرا چەودیری بەرژەوەنی هاووڵاتیەگان و مقەیەتییان و زاڵکردن یاسا، چەتەیل تاوان و کەمەڵەیل لەیاسا دەرچگەیل دەسکەنە کارە نانەجیبەیلیان و تاوانەگان دژوە هاووڵاتیە ئارامەگان ئەنجام کەن، ئەرا دروسکردن ئاژاوە و رخبردن مەردم.
وتیش؛ ئی چەتەیلە ئیوارەی ئمڕوو تاوان خویڕیانەیگ کردن لە ناوچەی بوشەعبان 'بوعامر' لە قەزای رەزوانیە لە بەغداد، وەختا وە مووشەکیگ کاتیۆشا ماڵ خیزانیگ کردنە ئامانج و وەیەکجاری وەیرانی کرد و بویە هووکار شەهیدبوین پەنج کەس ' سێ مناڵ و دوو ژن' وزەخمداربوین دوو مناڵ، وشوون وەشانن مووشەکەگان دیاریکریا لە ناوچەی حەی جیهاد.
ئۆپراسیۆنە هاوبەشەگان دیاریکرد ک موستەفا کازمی فەرماندەی گشتی هێزە چەکدارەگان، فەرماندا وە گردن هێزە ئەمنیەگان ک شوونەگە گردنە، وگشت لایەنە ئەمنیە پەیوەندیدارەگان ئەرا بەندینکردن، لەوەر خەمسەردییان لە ئەرکەیلیان، وئەوەسا سزای هەر هێزیگ دریەێد خەمسەرد بوود و ری بیەێد وەیجوور پێشێلکاری ئەمنیە، وتیش؛ فەرماندا وە کردنەوەی لێکۆڵینەوەی کوتپڕیگ وە رووداوەگە و وەشوونکەفتن تاوانبارەگان لە هەر لایەنیگ بوینە تا سەختترین سزا وەربگرن.
