کوشیان ٨ کەس لە تیم فڕۆکەی ئاگرکپەوکردن تورکیا

شەفەق نیوز/ فڕۆکەی ئاگرکپەوکردن کەفتە خوار، و هەشت کەس لەناوی بوبن، ئەوەیش ئمڕوو شەممە، لە شار قەهرەمان مەرعەش لە باشوور تورکیا، لە مەوقەی ئەرک کپەوکردن ئاگرەیلە.

تیمەیلیگ ئاگرکپەوکردن لە رووسیا و تورکیا لەناو ئەو فڕۆکە بوین، و وەزارت وەرگری رووسیا وت: پەنج کەس لە تیمەیل رووسیا لە رووداوەگە کوشیان.

ئاژانس خەوەری فەرمی  ئەنادۆڵ تورکی وت: فڕۆکەگە پەیوەندی وە وەڕێۆبەرایەتی دارستان گشتی دیرێد، وتیش؛ تیمەیل مینەکردن و رزگارکردن وەرەو ئەو شوینە کل کریان.

ئاژانس دی ئێچ ئێه خەوەری وت: فڕۆکەگە لە مەوقەی کپەوکردن ئاگر دارستانیگ لە دەورگرد ناوچەی بیرتیز کەفتە خوار، وتیش؛ تا ئیسە هووکارەیل ئەو رماننە دیاری نەکریانە.

کەناڵەیل تەلەفزیۆن تورکیا سیمایلیگ پەخش کردن ک بەرزەوبوین دویکەڵ لە ناوچەیگ کوێەیی نشان دەن.