شاە کۆکایین.. ئیتالیا دویای ٢٨ ساڵ تاوانکاریگ وەرگرێد
شەفەق نیوز/ ئاخری، ئیتالیا یەکیگ لە رخبەرترین پیاوەیل مافیا وەرگرد ک داواکریاگ جەهانیە، ئەندام مافیای ناسریاگ وە "شاە کۆکایین" روکۆ مورابیتۆ، دویای ئەوە ک توەنست تا ماوەی ٢٨ ساڵ لەدەسیان بواێد.
مورابيتۆ لە ساڵ ٢٠١٨ لە ئۆرۆگوای دەسگیر کریا، و لە ساڵ ٢٠١٩ لە زیندان وای، وەرجەیەگ لە ئایار ٢٠٢١ جاریگتر لە بەرازیل بگریەێد.
بەرازیل، روکۆ مورابيتۆ بازرگان هووشبەری دادەس وڵاتەگەی، دویای ئەوە ک پارەکە ئینتەرپۆڵ دەسگیری کرد، و وەناو "شاە کۆکایین میلانۆ" ناسریاگە.
لە ساڵ ١٩٩٤، دەسەڵاتەیل ئیتالیا فەرمان ٣٠ ساڵ زیندانی سەخت وە توومەت بازرگانیکردن وە هووشبەری لەبان مورابيتۆ دەرکردن.
مورابيتۆ لە بنەماڵەیگە پەیوەندی وە سەرکردەی مافیا جوزیبی مورابيتۆ دیرێد، و رەسیە پۆست بەرزیگ لەناو مافیای "نەدرانگیتا" ک لەبان بازرگانی کۆکایین زاڵە، و کارەیلی رەسێدە دەیشت ئیتالیا لە ئەمریکای باشوور، ک گشت ئی ماوە لە دەسەڵات وایە.
هەنای لە ساڵ ٢٠١٧ دەسگیر کریا، پۆلیس دەوانچەیگ و١٣ مۆبایل و ١٥٠ وینە ئەرا پاسپۆرت ساختەکاری لەلای پەیا کرد.
دادگای فیدراڵی باڵای بەرازیل، بڕیار رەوانەکردن مورابيتۆ ئەرا ئیتالیا لە هەفتەی گوزەشتە برد، وەرجەیەگ دەسەڵاتەیل دویەکە چوارشەممە دەسگیری بکەن.
