سەرکردەیگ ئیرانی لە پشت پەردەی پەلاماردان ئیسرائیل ئاشکرا کەێد
حاجی زادە، لە دیداریگ تەلەفزیۆنی، راگەیان کە ئی ئۆپەراسیۆنە تەنیا بەشیگ کەم بوی لەو هیزە سەربازییە کە وڵات دیرێدەی، وتیش: “لەسەدا 20ی بڕ توانایل ئران کە ئامادەی کردوێد، ئەرا چەسپیان سزا وەبان دوژمن زایۆنی وەکەڵک هاوریا، ” وە قسەی ئاژانس “تەسنیم” ئیران.
وتیش: دویای زیاتر لە 50 ساڵ، ئیران گورزیگ تون لە قەوارەی زایۆنی دا، ئەوان باوەڕ وەپی نەکردن، دووپات کرد کە “ئمڕوو دەسەیلمان پڕە لە چەک و دوژمن ئی خاڵە زانێد و ئۆپەراسیۆن پەیمان راسگوو وە چەک خوەیماڵی دەرچگ، ئۆپەراسیۆنیگ کە راهێنان نەوی، بەڵکم شانۆیگ پراکتیکی راستەقینە بوی.
دووشەممەی گوزەشتە رەمەزان شەریف، قسەکەر سوپای پاسداران ئیران ئاشکرا کرد کە “لە ئۆپەراسیۆن “پەیمان راسگوو” لە بواری وەرگری ئاسمانی، ئەرا نواگیریکردن مووشەک و فڕۆکەیل ئیران، 10 وڵات دەسمیەتی ئیسرائیل دانە”.
ئیبراهیم رەئیسی سەرۆک کۆمار ئیران لەی دویاییە وت: “ئەگەر ئیسرائیل پەلامار خاک ئیران بیەێد، دیار نییە کە ئەگر چشتیگ لەی رژیمە بیمینێدەو”.
رەئیسی لە سەردانەگەی ئەرا پاکستان وەرد خوەنەوارەیل زانکۆی لاهور قسە کرد و وت: ئەگەر ئیسرائیل جاریگ ترەک هەڵەیگ بکەێد و پەلامار خاک ئیران بەێد، خوو کەفێدە روی کاریگ تەواو جیاواز و دیار نییە ئەگەر چشتیگ لەی رژیمە بمینیدەو.
دویاترین پیشهاتەیل دویای ئەوە تیەێد کە ئیسرائیل کونسوڵخانەی ئیران لە دیمەشق پایتەخت سوریا کردە ئامانج، و ئۆپەراسیۆنەگەیش بویە مدزو کوشیان فەرماندە و ئەفسەرەیل باڵای سوپای پاسداران ئیران.
تەهران وە پەلاماریگ بی وینەی فڕۆکەی بێفڕۆکەوان و مووشەک وەبان ئیسرائیل وەڵامی دادەو.
رووژ 19ی نیسان گوزەشتە، راپۆرتەیل وتن: کە پەلاماریگ ئیسرائیلی کە وە "سنووردار" باسی کێیەێد، بنکەیگ هیز ئاسمانی ئیرانی لە نزیک شار ئیسفەهان، لە قویلایی ئەو وڵاتە، نزیک لە دامەزراوە ئەتۆمییەیل کردە ئامانج.
