زەویلەرەی سوریا.. رمیان بینایگ و تاڵانکردن ماڵەیل وەلایەن کەسەیلیگ بیگانە
وەڕیەوبەرایەتی وەرگری شارستانی لە حمس، عەمید غەیات عاقل وت: بیناگە چووڵە، و لە تاوانەیل تیرۆری زەردمەن بویە.
وتیش: رمیان بیناگە لەوەر ئەو زەویلەرزەی دویاییە بوی، دیاری کرد ک بینایل شانی چووڵ کریان وەخاتر سەڵامەتی.
هەلیوا، خەڵک ناوچەی جەندریس لە عەفرین داد لەدەس دزەیلیگ نەناسریاگ کردن ک دویای ئەو زەویلەرزەی ویرانکەرە لە تورکیا و سوریا، ماڵ و پویل و تەڵایان تاڵان کەن.
محمد سەبری خەڵک ناوچەی جەندریس وت: چشتەیل ناوماڵە وەگەرد پویل و تەڵا دزیەن، و نیەزانمن ئی دزەیلە لەکوو هاتنە.
خەڵک جەندریس لە کورد دووپات کردن ک کەسەیلیگ نەناسیاگ بیگانە هەرلە رووژ زەویلەرزەگە دەسکردنە دزیکردن.
نەشئەت خەلیل، خەڵک عەفرین ئویشێد: داوای چاردیگ کردم لە وەردەو ماڵە رمیایەگەم هەڵی بیەم، وەلێ ئەوان وتن بایەتە بچیدە ناو کامپ، منیش وەوە رازی نییم، و بڕیار دامە لەوەردەم ماڵ خوەم بمینم، چوینکە دزی و تاڵانکردن فرەوە بویە، ئەراوە ئیسە هامە ناو ماشین.
