گەردەلویل دوکسوری وڵات چین خەێدە ئامادەباشی
هووشداری سوور، ک لە ساعەت ٨ وە وەخت وڵاتەگە دەسوەپی کردیە، (ساعەت ١٢:٠٠ وەوەخت گرینیتش) ناوچەی فراوانیگ گرێدەو کە مەلیۆنا کەس لەناوی هەس، کە پەکین و شار تیانجین شانی و ناوچەیل خبی لە باکوور و شاندۆگ لە خوەرهەڵات گرێدەو.
ئمڕوو شەممە، واران دەسکردە وارین لە باکوور چین، وەگەرد هاتن یەکیگ لە تونترین گەردەلویلەیل کە یە چەن ساڵیگە داگە لە وڵاتەگە، روی وەرەو پەکین پایتەخت کەێد، دویای ئەوە ک فیلیپین و تایوان داگیر کرد و داد لە کناراوەیل چین.
مەزەنە کریەێد، ئمڕوو شەممە، گەردەلویل تریشقە لە پایتەخت بڕەسێدە لویتکەی، و مەزەنە کریەێد واران وە بەرزی ١٠٠ ملیمەتر یا زیاتر لەبان ٢٢٠ هەزار کێلومەتر چوارسویکە کەڵەکە بوود، لەسای رەسین گەردەلویلەگە ئەرا هشکایی، کە مەزەنە کریەێد کاریگەری لەبان ١٣٠ مەلیۆن کەس بیاشتوود.
وەڕیەوبەرایەتی کەشناسی وتیش؛ سەختی گەردەلویل دوکسوری ها کەمووبوین، باوجی کاریگەریی تەواو نەویە، و داوا لە خەڵکەگە کرد هووشیار بوون دویر بکەفن لە ناوچە سەختیەیل لە ناوچەیل پەکین -تیانجین- خبی کە هاتێ واران لەناویان بڕەسێدە ٦٠٠ ملیمەتر.
هاتێ ئاسا چەمە بویچگ و ناوڕاسەیل لەی رووژەیل بانانە باێدە بان لە باشوور پەکین و ناوڕاس هەرێم خبی و بەشیگ لە خوەرئاوا و بەشیگ لە خوەرھەڵات لە هەرێم شانسی و بەشیگ لە ناوچەیل باکوور لە هەرێم خنان، و هاتێ لافاو و رخبەرەی جیوڵۆجی لە دەورگرد ناوچە کوێەیلە هەڵسێد.
دەسەڵاتەیل پەکین رویداوەیل وەرزشی وسانن، و بڕیگ لە شوینەیل گەشتیاری بەسان.
میدیایل راگەیانن وتن: وەڕیەوبەرایەتی کۆنتڕۆڵکردن لافاوەیل لە شارەگە وتیە؛ ٢٠٣٢٣٠ کەس لە تیمەیلی بڵاو کردیە، و ٣٠٣٢ کەس لەو شوینەیلە دەرکریان.
میدیایل راگەیانن فەرمی وتن: ئەوە بویە هووکار بەسیان مەکتەو و دامودەزگایل وەگەرد دەرکردن کراکارەیل لە کێلگەیل نەفت و کار و دەریاوانی.
