دزەیلیگ لە یەمەن قەور کابرایگ واز کەن تا تەڵا لە دگان وپشت تەرمەگەی درارن
شەفەق نیوز/ تەما و هەرسناکی هیشت دزەیلیگ قەور کابرایگ واز بکەن، تا تەڵای ناو پشت تەرمەگەی درارن، چوینکە ئەو کابرای مردگە هەنای زنی بویە، پشتی پلیاگە، و چەن سوخانیگ لە پشتی وە تەڵا دروس کریاگە.
دزەیل قەور ئەو مردگە واز کردنە، و ئەو پارچەیە تەڵا ک لەپشتی چەسپیانە دراوردن، هەمیش دگانەیل تەڵایی کیشان.
وەگورەی میدیایل راگەیانن یەمەنی، مردگەگە وەرجە ٧ مانگ تویش جەڵتە هاتگە وگیانی لەدەس داگە، ک خوەی پیشەی کارەباچی بویە لە پارێزگای موهرە.
دویای مردنی و دویای ئەوە ک نریا خاک، چاوەیگ کەفتە ناو مەردمەگە ک ئەو کابرا وەرجە مردنی پارچەیل تەڵا نریا ناو پشتی، هەنای وەرجە ماوەیگ پشتی پلیا، و کۆمپانیای گەورەیگ ک لەلای کار کردیە خەرج ئەو نەشتەرگەریە دایە.
هەرچەن هیمان مەردم نیەزانن ک ئەو چاوە راسە یا درووە، باوجی هەر ئەو قسە لەناو مردم بوی، ک هیشت کەسوکارەیل مردگەگە تا چەن رووژیگ دویای مردنی پاسەوانی قەورەگەی بکەن.
شەوەکی ئمڕوو، دویای هەفت مانگ لە مردن ئەو کابرا، خەڵک ئاوایەگە سەرسام بوین، ک قەورەگە واز بویە، و تەرمەگە دزیاگە.
