تووشهاتنەگان کۆرۆنا لە جهان ٢٥ مەلیۆن رەدکەن

ژمارەی تووشهاتنەگان ڤایڕۆس کۆڕۆنا لە جهان، ئمڕوو یەکشەممە، لە ٢٥ مەلیۆن تووشهاتگ رەدکردن، لە نیمیگیان زیاتر هالە هەردوگ ئەمریکاگە.

لە ئاماریگ ئەرا ئاژانس فڕانس پڕس، ژمارەی تووشهاتنەگان وە ڤایڕۆس کۆڕۆنا رەسیە زیاتر لە ٢٥ مەلیۆن تووشهاتن لەگشت جهان.

ئاژانسەگە وەت؛ ئەو ئامارە ، لە ساعەت ٤:٢٠ شەوەکی رووژ یەکشەممە لەبنەمای سەرچەوەیلیگ فەرمی ئەنجامی داگە.

وتیش؛ وە گشتی، ژمارەی تووشهاتنە ئاشکراکریایەگان وەگورەی ئی ژمێریاریە رەسیە: ٢٥،٠٢٩،٢٥٠ تووشهاتن، لەناویان ٨٤٢،٩١٥ مردنە.

هەر لە ١٠ تووشهاتن چواریان لە ئەمریکا وبەڕازیل تۆمارکریا، ک هەردوگیان زیاتر زەردمەن بوین لە پەتاگە.

لە ئەمریکا، ژمارەی تووشهاتنەگان رەسیە: ٥،٩٦٠،٦٥٢ تووشهاتن، لەلیان ١٢٠،٢٦٢ مردنە.

وڵات هیند، وەگورەی بەیاننامەیل وەزارەت تەندروسی ئەرا رووژ یەکشەممە، زیاتر لە ٧٨ هەزار تووشهاتن نوو وە ڤایڕۆس کۆرۆنا تۆمارکریا، ک خوەی بەرزترین ئامار رووژانەیە لە وەخت بڵاوبوین پەتاگە، تا ژمارەی تووشهاتنەگان بوودە زیاتر لە ٣،٥ مەلیۆن، وەگورەی پەیامنێرەگەمان.

وەگورەی بەیاننامەیل وەزارەت تەندروسی هیند، لەماوەی ٢٤ ساعەت گوزەیشتە ٧٨،٧٦١ تووشهاتن نوو تۆمارکریا، تا ژمارەی گشتی تووشهاتنەگانی بوودە ٣،٥٤٢،٧٣٤ تووشهاتن.

هەمیش ٩٤٢ مردن وەڤایڕۆسەگە تۆمارکریا، تا ژمارەی گشتی مردنەگان بڕەسێدە ٦٣،٤٩٨ مردن.