ڤایزەر داوای مۆڵەت وەکارهاوردن ڤاکسین ئەرا مناڵەیل کەێد
شەفەق نیوز/ ئیدارەی خوەراک و دەرمان ئەمریکا لە 15ی شوبات ئەرا گفتوگوکردن لەباوەت ئی داواکارییە، کۆبۊنەوە ئەنجام دەن. کۆمپانیای دەرمان فایزەر ئەمریکی و کۆمپانیای بایۆنتێک ئەڵمانی، داواکارییگ پیشکەش ئیدارەی خوەراک و دەرمان ئەمریکا کردنە تا ری بیریەێدە ڤاکسین کۆرۆنا ئەرا مناڵەیل خوار پەنج ساڵ وەکار بارێد.
لە راگەیانراویگ هاوبەش ئەو دو کۆمپانیایە خسنەرۊ، لەوەر پێویستی کوتان مناڵەیل خوار پەنج ساڵ وە گرنگ زانینە داوای ریوەپیدان ئەرا وەکارهاوردن ڤاکسین بکەن.
یەیش لە وەختیگ لە ئەمریکا یەک ملیۆن 600 هەزار مناڵ خوار تەمەن چوار ساڵ تا ئیسە تۊش کۆرۆنا بۊیە.
هەرلەوەر یە فایزەر-بایۆنتێک لە داواکارییگ پێشنیاز کردنە ری دو تاقەبەش ڤاکسین کۆرۆنا ئەرا مناڵەیل تەمەن شەش مانگ تا پەنج ساڵ وەکاربارێد.
بڕیارە ئیدارەی خوەراک و دەرمان ئەمریکا لە 15 شوبات ئەرا گفتوگو کردن لەباوەت ئی داواکارییە، کۆبۊنەوە ئەنجام بدەن.
تاقیکردنەوەی کۆمپانیایەیل دەرمان ئەرا وەکارهاوردن سێ تاقەبەش ڤاکسین ئەرا مناڵەیل خوار تەمەن پەنج ساڵ وەردەوامن.
