دنــــــــیا
كەسێ كەسێ نيەناسێ، گيشتێ دەم ئەڵپێچانه
نه بوو هناس° ئێشقه، نه رووژنای° ڕاسی
دِنيا خڕاو، دِنيا گەن، دِنيا دروو دەسانه
زەمین زەردو زەمان زەرد، ئاسارەو ئاسمان زەرد
كۆتێ داخیم، كۆتێ دەرد، ده ئێ زەرده لۊلانه
تەو ئەڵکزان سقانم، لەرز ئەڵچەقان دنانم
گيانم بۊه پەتەسوو، دەێ ئاگر° گڕانه
شڵەێ شەڕەو گڕەێ نار، گرمەێ گۆرگەو هافەێ مار
يه كەێ بەخته؟ بێداده؛ يه کەێ تاڵەس؟ تاڵانه...
هەم زەرده واێ پەژارەس، هەم سەردە واێ پەشێوی
ڕوو دەێ زەرده زەمانه، وەێ دەێ سەرده ساڵانه
ئاگر ها ده دەرۊنم، زەهراو ها نام°خۊنم
ئووخەیم پڕ ده ئاخه، ژيانم پڕ ده ژانه
زەمین زەخمو زمین زار، زەمین ژەهرو زەمین ژار
زەمین پەلامێ بڕیا، زەمین بێ ئــــــاسمانه
باڵ° فرێشته ڕزیا، باخ° بهەیشت ئەڵكزيا
دووزەخ هفاودا دنیا، ئێ ئژدهاێ خوڕانه
ئێ° بار° پڕ ئەنيشه، ئاخر ئەڕا چه كيشيم؟؟؟
ئێ هەمگه ئەزاوه، ئاخر ئەڕا چەمانه؟؟!
وڵ‌که خێاڵ° هاتگ، بڕواكن ئێ هناسه
وڵ‌كه پەژارەێ ناتگ، مەس بوو ده ئێ ئەلانه
تووز° تيەڵەو تەم° ڕەش، كۆل كەفتنه كەش ئەڵ کەش
كەس دەر نيەچوو وه بێ بەش، مەردِم! ده ئێ قڕانه
دارەل ئەڕا چه هشكن؟! گۆڵەێل ئڕا نيەوشكن
قەناریەڵ° دڵ تەڕ، بێ دەنڰ ئەڕا وسانه؟
ئەورەێلمان مەزووکن، تافەێلمان مەڕێژن
نه تافه تاف° ڕێژاو، نه نم‌نم° وارانه
نه ڕووسەمێ دياره، نەيشه ئسفەندِيارێ
نه شوون° قارەمانه، نه نوون° پاڵ°وانه
نه دین ماگه، نه ئێمان، ساێڵ ڕەم کەێ ده سامان
هووشو گووشو پووسمان، پڕ ده شەڕەو شەێتانه
زەمانه پا وە مانڰه، ئەوجار ئەڵامەت ئاورد
ئێجار بزانيم چەزاێ، ئێ ژن° زاوەرانه؟!؟
شكيا دڵو پێشتمان، كردنه ئـــــــاڵێشتمان
گۆم بۊمنه گێشتمان، ده ئێ چوارده ڕێانه
نه چەفتيمن نه ڕاسيم، نة گەنیمن نه خاسیم
بڕێ خۆەمان مەناسيم، مايمه دەێ نام° مەرزانه
زووانمان شێويــــــــا، بۊه وەفرو تێويــــا
تێوێەێگەو جوور° وەفر، هەرکەس ک° بێ زووانه
په لام ئەو كی بوەیمن؟ دەێ زەرد° بێ‌زواڵه
هاوار ئەو كوو بكيشيم ؟دەێ هۊچ° بێ هچانه
بڕێ گۆرگن -دنان هار-، دەێ جەنڰەڵ° جنوونه
بڕێ وەركن -وەرەلا -، دەێ دەیشت° بێ شووانه
بارێ ها بان° كووڵم، چەنه كۊەێ بانكووڵه
قيڕەێ ها قوڕن° دڵم، چەنه قڵاقيــــڕانه
خۆەزەو ڕها بۊاتايم، رووژێ وه كامو ئەزرەت...
ده ئێ زرپو زوورانه، ده ئێ گۆرزو گۆچــــانه
خۆەزەو واران بوارێ، دەێ هــــەڵەت° هڵاكه
خۆەزەو شةفةق بوشكێ، دەێ شەو° بێ بەێانه
قسيەم ڕاسه شەکەته، خۆەزەو نامەێ ئمێـــــده
شێئرم ڕاسه لەت لەته، بەزه نامەێ ژيــــــانه
زاهر سارایی
