هاواریگ لە هەڕەشەی خراوبۊین ژینگە

Category: وتـار

Date: 2021-11-25T12:52:31+0000
هاواریگ لە هەڕەشەی خراوبۊین ژینگە

کەنعان موڕاد/ ( بەسە خراوکردن رەنگاوڕەنگی بایۆلۆژی، بەسە کوشتن خوەمان وە کاربۆن،  بەسە رەفتارکردن وەگەرد سروشت جۊر بایۆلۆژی، بەسە سزیان و چاڵکردن و دراوردن لە قۊیلی زیاتر، ئیمە دیریمن قەور خوەمان کەنیمن).       

وەی قسەیلە ئەنتۆنیۆ گوتیرش ئەمیندار گشتی نەتەوە یەکگرتگەیل ئەرا سەرکردەیل جەهان وت، ئەوەیش لە گردەوبۊن قەیران کەشوهەوا لە گلاسکۆ،  ک ئی قەیرانە هەڕەشەی لەناوبردن مەردم دەێد.        

سەرکردەیل جەهان ک خاوەن دەسڵاتن لەبان ئی زەۊی بەسەزوانە، گردەو بۊین تا باس گرفتیگ بکەن، ک دەوڵەتەیل خوەیان دەس لە دروسکردنی دیرن، و کەسیگ لەلیان ئامادەیی خوەی ئەرا نواگردن ئی کەلەمی زینگەییە نشان نەیا، ک وە زیاتر لە ١٨٠ فڕۆکەی تایبەت رەسینە گلاسکۆ،  و هەڵبەت ماشینەیلیان و چشتەیل خوەیان وەگەردیان هاوردن، و پاپای ئەو هەمکەی گاز ژەهرینە نەۊین ک ئەرا رەسینیان وەرەو ژینگە مەرەقزی کردن.                

سەرۆک ئەمریکا، هەکاتی سەرۆک وەرینی دۆناڵد ترامپ لە پرۆتۆکۆل کیتوتو و رێککەفتن پاریس خوەی کیشادەو،  لە پشت ماشینەگەی ٨٥ ماشین کەفتنە ری، و ئەوانیش گاز کاربۆن وەرەو سینەی زەۊی وەشانن، و هەڵبەت ئەو سەرکردەیل جەهانیش لەو کردەوە دۊیر نیین.    

گووش لە مزگەفتیگ گردم، ک هاوار وەی مەردمە کردیاد، ئی مەردمەگە، ئی هشکەساڵیە لەوەر گوناهەیل ئیوە خودا وەپیمان کرد، ک ئیوە مەی نووشین، و واز لە مزگەفتەیلە هاوردینە، و بایەتە کارەیل خوەدان خاسەو بکەین، تا خودایش کار ژینگە خاسەو بکەێد.    

باوجی ئەو ئیمام مزگەفتە لە هۊیری نەۊی، ک ئەو هەمکەی وەکارهاوردن پلاستیکە، و ئەو هەمکەی ماشینە ک وەبیخودی لەناو جادەیلە رانیەن، و ئەو سزیان و بڕین باخ و دارستانەیلە، نەگ مەی نووشین، یا وەمزگەفت چگن، دەس لە خراوکردن ئی ژینگە دیرن، و بایەت بۊی بڕین پەل داریگ (حرام) بۊیاتاد، چۊنکە زەرەد وە سرووشت و کەشوهەوا دەێد، و هەڵبەت زەرەد وە مرۆیی گشتی دەێد.                

نەوەیل هاتگ و دۊیارووژ مرۆیی،  لە هۊیر پیاوەیل ئاینی و سیاسییش نییە، ک سیاسیەیلە و دەسەڵاتدارەیل بان زەۊی تەنیا هانە هووڵ زیایکردن دەنگدەرەیلیان، و پیاوەیل ئاینی هانە هووڵ زیایکردن نمازخوەنەیل پشت خوەیان.       

دۊیای ساڵەیلیگ لەو لافاوەیلە ک شارەیلیگ نوقم کردن و دەیان کەس خنکانن، و ئەو ئاگرەیلە ک هەزاران هیکتار لەو دارستانەیلە سزانن، دی باس کام ئایندە کەن؟       

ئی سەردەمە، جەهان کەفتە کوتیان زەنگ رخبردن، ک تووکڵ زەۊی پڕە لە گاز ژەهرین، و هەڕەشەی زەۊی و مەردم دەێد، و ئیسە داوای وسیان مەرەقەزکردن گاز و سەردەوکردن زەۊی کریەێد.    

ئەو کردەوەیلە ک ئمڕوە وەپیمان کریەێد، شایەت جۊر تاکە کەسەیلیگ، تەنیا هاوارکردن وەپیمان بکریەێد، و یەیشە جۊر هاوارێگە لە دڵ.          

related

جیکەی مەلۊچگ وە خوەشی واران

Date: 2021-11-17 14:21:08
جیکەی مەلۊچگ وە خوەشی واران