واران ناوچەیل فرەیگ لە بەغداد پایتەخت نقوم کەێد
2023-01-05T10:12:02+00:00
شەفەق نیوز/ فرەی ناوچەیل بەغداد پایتەخت، لافاو وەخوەیان دین، ئەوەیش لەوەر ئەو واران رفتە، ک وەگەردی کارەبایش بڕیا، لەوەر تەقیان فرە لە محویلە و تەڵەیل وزە، ک هەر زمسانیگ ئی کارە دووارەو بوود.
وەگەرد یەکەمین واران لە ساڵ نوو، فرەی جادەیل بەغداد و چەن پارێزگایگ، بوینە گوڵەم، ک ئاو وارانەگە لەناویان پەنگەو خوارد، و هەمیش ئاوەگە چگە ناو ماڵ و دوکانەیل، هەرچەن تەقەلای خزمەتگوزاری ئەرا دراوردن ئاوەگە هەس، وەلێ فرە لە ناوچەیل پایتەخت کەفتنە وەر لافاو.
وەگەرد وارانەگە، کارەبایی لە ناوچەیل فرەیگ بڕیا، ئەوەیش لەوەر تەقیان محویلەیل کارەبا و سزیان تەڵەیل وزە، چوینکە کۆنە بوینە، و یە ماوەی فرەیگە کار کەن، یەیش کەفێدە بان زیان و مەینەت خەڵکەگە لە وەرزەیل زمسان.
