رميان زەوی "هيماڵايا" دەیان کەس کوشێد و دەیان بیسەروشوین کەێد
لە ماوەی یەک و دوو ساڵ گوزەشتە وارانەیل رفت نائاسایی و تاویان یەخ بویەسە مدوو دروسبوین لافاو مەرگبار لە ناوچە کویەیل هیندستان و پاکستان و نیپاڵ هاوسای، کە وەرپرسەیل حکومەت گلەیی خەنە بان ئاڵشتبوین کەشوهەوا.
گرتە تەلەفزیۆنییەیل ویلایەت هیماچال پرادێش هیندستان دەرخەن کە ماڵەیل لەوەر زەوی لەرزین و پاس و ماشینەیل لارەو بوین و کەفنە سەرەوخواری دویای رمیان ریوبانەیل، سەدان کەسیش لە شوینەیل فریاگوزاری نشان دەن، هەناێ تیمەیل فریاگوزاری تەقەلای پاککردن ریەگە دەن.
سوخڤیندەر سینگ سۆخۆ، سەرۆک وەزیرەیل ویلایەت هیماچال پرادێش لە پۆستیگ لە کەناڵ ئێکس (تویتەر جارانی) راگەیان "جاریگتر کارەسات تیەێدە بان هیماچال پرادێشدا و واران وەردەوام لە ماوەی 48 ساعەت گوزەشتە وارێد".
وتیش "لە ناوچە جیاوازەیل رەوش واران و زەوی لەرزین ڕاپۆرتەیل نشان دەن کە لە ئەنجام زریانیگ وارانی مردگ فرە زەرەد مادی کەفتیە ".
وەگورەی راپۆرت بەش وەڕیەوبردن کارەساتەیل ویلایەتەگە، کە رۆیتەرز بڵاوی کرد، لە رووژ یەکشەممەو لەلای کەمەو ٤١ کەس لەوەر واران گیانیان لەدەس دانە و تا ئیسەیش ١٣ کەس بیسەروشوینن.
سۆخۆ وتیش: لە یەکیگ لە رویداوە مەرگبارەیل پەرستگایگ لە شیملەی پایتەخت ویلایەتەگە رمیا و رزگارکەرەیلیش لەلای کەمەو نۆ تەرم دراوردنە.
گرتەیل تەلەفزیۆنی نشان دانە کە چەمەیل لە هیماچال و ویلایەت ئوتار کاند هاوسای لافاویان بەرزەو بویە، کە بڕیگ پەیمانەیی لە واران زیان وە ریوبان و ژیرخانەیلیش رەسانیە.
وەزارەت کەشناسی هیندستان رووژ دووشەممە "ئاگاداری سوور" لە هەردوگ شار هیماچال پرادێش و ئۆتار کاند بڵاو کردیە و مەزەنەی کەمی وارانەگە کرد لە سێشەممەو وەرەودویا.
لەلای خوەییش فەرمانگەی کەشناسی راگەیان: لە ماوەی 24 ساعەت گوزەشتە 273 ملیمەتر واران لە هیماچال واریە، و 419 ملیمەتر لە ئۆتار کاند واریە تا ساعەت 3ی شەوەکی دووشەممە ووەخت گرینیتش.
