لە دیالە و نەجەف... دراوردن تەرم گەنجیگ و زەخمداری ژنیگ وە چەک راوکردن

شەفەق نیوز/ دوو سەرچەوەی ئەمنی لە دیالە و نەجەف، ئمڕوو پەنجشەممە، خەوەردان لە دەراوردن تەرم گەنج مردگیگ و زەخمداری ژنیگ وە رویداوەیل جیاجیا لە دوو پارێزگا.

سەرچەوەیگ ئەمنی لە دیالە وە ئاژانس شەفەق نیوز وت: " پۆلیس دەریاوانی ئمڕوو توەنستن تەرم هەرزەکار 14 ساڵانیگ درارن ک لە چەم دیالە لە ئاوای مەهافیف سەر وە ناحیەی جەلەولا خنکیایە، یەیش لە دویای دوو رووژ وەبان یەک لە مینەکردن"، وتیش تەرمەگەی ئەرا پزشک دادوەری کلکریایە. 

وتیش" گەنجیگ دانشتگ قەزای خانەقین لەوەر زەخمداری وە رویداو هاتوچو ک لە گوزەشتە لەبان ری موقدادیە - خانەقین رویدا گیان لە دەسدا" وتیش، " گەنجەگە ئەرا چارەسەر و چەودیری هویرد ئەرا خەسخانەیگ لە بەغدا کلکریاوێد باوجی گیان لە دەسدا". 

لە نەجەف سەرچەوەیگ ئەمنی وە ئاژانس شەفەق نیوز خەوەردا، "هیزەیل ئەمنی ژن زەخمداریگ هەڵگردن  ک تویش زەخمداری سەختیگ هاتوێد، وە تەقەکردن لە ملی وە چەک راوکردن لەناو ماڵەگەی لە ناحیەی عەباسیەی ناوراس پارێزگاگە"، وتیش ، ژنەگە ئەرا خەسخانەی سەجاد کلکریایە لە ناوراس نەجەف وهووشی لە دەسدایە.

وتیش، وەپای زانیاریەیل سەرەتایی هێزەیل ئەمنی دیاری کەن ژنەگە هاوسەردارە و لەداڵگبوی 1997 رویداوەگە لە کوشتن چوود.