نەجەف و دیالە.. ژنیگ خوەی سزنێد و کابرایگ وە ماتۆڕسکیل کەفێدە جوویگ ئاو

شەفەق نیوز/ سەرچەوەیگ لە دیالە، ئمڕوو چوارشەممە، خەوەردا لە زەخمداری دوو مەدەنی هەنای ماتۆڕسکیل "سەتوتە"یان کەفتە ناو جوویگ ئاویاری لە دەورگرد قەزای خاڵس.

سەرچەوەگە ئەرا ئاژانس شەفەق نیوز وت: دوو کەس زەخمدار بوین، یەکیگیان زەخمەگەی سەختە، دویای کەفتن ماتۆڕسکیلیان وەناو جوویگ ئاویاری لە ئاوای ئەبو تەمر لە دەورگرد قەزای خاڵس.

وتیش: دوو زەخمدارەگە بریانە خەسەخانەیگ نزیک.

لە نەجەف، سەرچەوەیگ ئەمنی، خەوەردا لە خوەیکوشتن ژنیگ وە ئاگر لە یەکیگ لە ناوچەیل ناوڕاس پارێزگاگە.

سەرچەوەگە ئەرا ئاژانس شەفەق نیوز وت: ژنیگ لەناو تەمەن سی ساڵان، لەناو ماڵەگەی لە ناوڕاس شار نەجەف وە بەنزین خوەی سزان،

وتیش: هووکارەیل خوەیکوشتنی تا ئیسە دیار نیین، ودەزگا ئەمنیەیلە لێکۆڵینەوە لە رویداوەگە کەن ئەرا رەسین وە بندروسی.