وە عراقیشەو.. قەیران هشکەساڵی هەڕەشە لە 25 وڵات جەهان دەێد

 زەنگ کەمی ئاو لە بیس و پەنج وڵات کوتێد، وەپەی ڕاپۆرتە نێودەوڵەتییەیل، لە ئەنجام زیایبوین شمارەی دانیشتگەیل، شارنشینی، پیشەسازی، ئاڵشتبوین کەشوهەوا، و شیوەی نەگونجیای لە رەفتارکردن وەرد ئاو، یەیش وەو واتە کە چوار ملیار کەس لەبان زەوی ساڵانە لەلای کەمەو یەک مانگ کەفنە وەر زوور کەم ئاوی  و ئی شمارە هاتێ لە ساڵ دوو هەزار و پەنجا زیاترەو بوود.

 میزۆپۆتامیا لەی قەیرانە بیوەی نییە، وەگورەی دەسنشانکردن ڕاپۆرتەیل  کە دوو چەمەگەی لە ساڵ دوو هەزار و چل نیەمینن، و کلیل چەوچەوەگە کەفتیەسە باس سەرچەوەیلی، ئیران و تورکیا، کە تا ئیسە بیهوچان ئاو لە دیجلە و فورات بڕن، وەبی پابەندبوین وە رێککەفتنە ناودەوڵەتییەیل، یەیش هیشت هەرویلک شارستانییەت هاوار لەدەس جەنگ ئاو بکەێد،  کە هاتێ بوودە بیوان بیبەریگ،  وە قسەی پسپۆڕەیل؛ ئەگەر وڵاتەیل وەردەوام بوون لە بەدوەکارهاوردن باوەت ئاوەگە و بکەنەی کارتیگ تا فشار بخەێدە بان عراق تا بڕەسنە بەرژەوەنییەیل خوەیان، جویر ئاڵشتکردن نەفت وە ئاو ئەرا تورکیا، لە وەختیگ وەزارەت سامانەیل ئاو وەردەوامە لە دانوسەنین وەرد هەردوگ وڵات ئەرا چارەسەرکردن ئی گیچەڵە.

 هشکەوبوین چوم دیجلە و فورات بویەسە مایەی نیگەرانی و رخیگ لەبان ئاسایش ئاو و خوەراک و ژینگەی عراق، وەتایبەت وەگەرد کەمەوبوین ریژەی تەکان ئاوەگە ئەرا لەسەدا سیی ماف سروشتی عراق، یەیش کاریگەری لەبان بەرهەم کشتوکاڵی و پلان تاوسانی دیرێد.