هوشدارییگ ئەمریکی ئەرا بەغداد: سزایەیل چەوەڕی هەر فڕۆکەخانەیگ عراقی کەن کە پیشوازی لە فڕۆکەیل ئیرانی بکەێد
شەفەق نیوز- بەغداد
سەرچەوەیگ حکومی وەرپرس، ئمڕوو یەکشەممە، ئاشکرا کرد کە بەغداد هوشدارییگ ئەمریکی جدی و راسەوخۆ وەرگردگە لەوەگ وەردەوامبۊن لە پیشوازیکردن هەر کۆمپانیایگ فڕۆکەوانی ئیرانی لەناو فڕۆکەخانەیل عراقی، وە دووپاتکردن ئەوەگ وەردەوامبۊن پیشوازیکردن لە فڕۆکەیل هیلێد فڕۆکەخانەگە و ئەو لایەن و کۆمپانیایەلە کە خزمەتگوزاری پیشکەش وە ئی گەشتەیلە کەن بخریەنە وەر سزایەیل ئەمریکی.
سەرچەوەگە ئەرا ئاژانس شەفەق نیوز وت، کە "لایەن ئەمریکی ئەرا حکومەت عراقی ئاشکرا کردگە کە رێکارە سزاییەیل تەنیا لەبان کۆمپانیایل فڕۆکەوانی ئیرانی کە سزایەیل گرێدەیانەو سنووردار نییەوود، بەڵکم شایەت بڕەسێدە هەر لایەن یا فڕۆکەخانەیگ کە خزمەتگوزاری پیشکەش کەێد یا ئاسانکاری ئەرا کارکردن گەشتەیل ئەو کۆمپانیایەیلە کەێد، کە خزمەتگوزارییەیل نیشتنەو و کارەیل زەوی و دابینکردن سزەمەنی و خزمەتگوزارییەیل ترەک بەسیاگ وە گەشتەیل لەناویانە".
وتیش کە "ئی هوشدارییە حکومەت عراقی خستیەسە وەرانوەر وژاردەی دۊرکەفتن لە خستنە وەر فڕۆکەخانەیل عراقی و کەرت ئاسمانی و ئەو لایەنەیلە کە لەناوی کار کەن ئەرا سزایەیل ئەمریکی، کە یەیش ناچار بەغداد کرد رێکارەیلیگ بگرێدە وەر ئەرا وسانن پیشوازیکردن گەشتەیل سەر وە کۆمپانیایل فڕۆکەوانی ئیرانی لەناو فڕۆکەخانەیل عراقی".
سەرچەوەگە دیاری کرد، کە "بڕیارەگە بەسیاگ نەۊە وە هەڵوێستیگ سیاسی عراقی لە وەرانوەر جویلەی فڕۆکەوانی وەرد ئیران، بەڵکم لە ئەنجام رخداریە یاسایی و ئابوورییەیل هاتگە کە لە سزایەیل ئەمریکییەو پەیا بوون، وە تایبەت کە وەردەوامبۊن پیشکەشکردن خزمەتگوزارییەیل ئەرا فڕۆکەیل ئیرانی شایەت ئەو لایەنە عراقییەیلە کە سەرەدەری وەردیان کەن بخریەنە وەر رێکارەیل سزایی".
وەپەی قسەی سەرچەوەگە، ئەوە حکومەت عراقی لە خود وەختەگە کار لەبان چارەسەرکردن لیکەفتەیل بڕیارەگە کەێد لەڕی کەناڵەیل دانوسەنین وەرد لایەن ئەمریکی، ئەرا وەدەسهاوردن وەخشینیگ کە ری وە وەردەوامبۊن بڕیگ لە گەشتەیل دەن ئەرا کارەیل مرۆیی و مەدەنی دیاریکریاگ، کە هەوەجەیل پزیشکی و فێرکاری و سەردانە ئاینییەیل لەناویانە، بی ئەوەگ فڕۆکەخانەیل عراقی یا ئەو کۆمپانیایەیلە کە لەناوی کار کەن بخریەنە وەر سزایەیل.
کووتایی وە قسەیلی هاورد و وت کە "بەغداد سەرەدەری وەرد دۆسیەگە کەێد چۊ پرسیگ سەروەری و ئابووری و ئەمنی لە یەک وەخت، و کار لەپیشینە لە ئیسە پارێزگاریکردن فڕۆکەخانەیل عراقی و کەرت ئاسمانییە لە هەر رێکارەیلیگ سزایی کە شایەت رەنگ بەێدە بان هامشوو فڕۆکەوانی و ئابووری عراقی".
لە وەختیگ زۊتر لە ئمڕوو، سەرچەوەیگ سیاسی ئاگادار ئاشکرا کرد، کە سەرکردەیل چوارچیوەی هەماهەنگی ئیوارەی ئمڕوو، گردەوبۊنیگ وە ئامادەبۊن سەرۆک وەزیرەیل عەلی زەیدی وەڕیەو بەن، ئەرا باس لە بڕیار قەیەغەکردن پیشوازیکردن لە فڕۆکەیل ئیرانی لە گشت فڕۆکەخانەیل عراقی، لەشان باس لە لیکەفتە سیاسی و جەماوەرییە ناوخۆییەیل کە لە بڕیارەگەو پەیا بوون.
حکومەت عراقی، دۊکە شەممە، خەوەر دا لە ئەنجامداین گفتوگۆیگ راسەوخۆ وەرد ئیدارەی ئەمریکی، ئەرا وەخشین بڕیگ لە فڕۆکەخانەیل عراقی لە قەیەغەکردن گەشتە ئیرانییەیل.
ئی پەرەسەنینە لەژیر سای سزایەیلیگ تیەێد کە وەزارەت خەزانەی ئەمریکی لە هەشت ئەیلول/ سێپتەمبەر خەوەر لەلیان دا لەبان 36 لایەن بەسیاگ وە کەرت فڕۆکەوانی ئیرانی، کە 27 کۆمپانیای فڕۆکەوانی لەناویانە.
هەڵوێست کۆمپانیایل گەشتیاری و گواستنەوەی هشکانی لە عراق جیاواز بۊن لە سزایەیل ئەمریکی لەبان کۆمپانیایل فڕۆکەوانی ئیرانی کە دەس وە جیوەجیکردنیان کریا دەسوەپیکرد لە رووژ چوارشەممەی گوزەشتەو.
