مردنیکی ناوەخت بەڵام ناوازە

ئەمڕۆ رۆژێکی جیاوازە، نیسانی ئمساڵ بەرگی پاییزی پۆشیوە، پەرێشانە و رەنگی زەردە و مژدەی شەهیدبونی دەیان "حەمە"ی هەڵگرتووە، لەگەڵیا مژدەی تۆ!.

 ‏مژدەی لەدایکبوونێکی نوێ لەنێو تەنۆلکەکانی گەردەلولەکەی هەڵگرتووە زۆر بە خێرایی و بەبێ وچان بەرەو دەرگای ماڵە باوانت  ئەڕوات، ئەوەندە خێرا و بەپەلەیە بۆ ساتێکیش ڕاناوەستێت، هەرکە گەێشتە بەردەرگا زۆر بەتوند و توڕەیی دەرگای ئەدا بەبێ ئەوەی هیچ چاوەڕێ بێت، گەردەلول پەیامی شەهید بونت و لەدایکونێکی نوێت لە دونیایکی نوێ  ئارام و بەرین پێ راگەیاندین.

بەڵێ لەدایکبوونێکی نوێ و رزگاربوونت لەم دونیایە پیسە، تۆ لەو رۆژەدا دوبارە لەدایک بویتەوە تۆ ئەم ژیانتەت بردەوە، بەڵام جلی باوانت و  تارای بوکێنی دوو مانگەی خوشکت بوو بە رەش ئەو خوشکەی کە هەردەم هاوێت بوو تەنانەت لە دوا ساتی دەرچونت لەماڵ دەسبەندێکی سەوزی لە دەستی تۆی بەست و پێ وتی خوا پشت و پەنات بێت.

برای شیرینم حەمە گیان ئەمڕوو یادی 9 ساڵەی شەهید بونی تۆ و حەمەکانی هاوڕێتە یادی شەهیدبوونی  36 گەنجی خوێن گەرم و بێ تاوانی خانەقینە، بە کارەساتێکی قێزەوەن، بنوون ئارام بنوون، شار بووە بە وێرانە و فرۆشراوە، زۆر دەمێکە تام و بۆنی خانەقینمان وەکو جارانی نەماوە.