وه جی سه‌رمایه هاوردن، ناسنامه بده‌ن
عه‌لی حسێن فه‌یلی / ده دنیای ئمڕوو، ده فره له وڵاته‌یل باو بییه ک هه‌ر که‌س سهرمایهگوزاری له‌و وڵاته بکه‌ێ، ناسنامه‌ی ئه‌و کشوه‌ر دده‌ن وه‌ێ، ده عراق، ئیمه ئیجوور قانوونی نه‌نایمنه.
ئێسه ک عراق تووش بێ‌پوولی هاتگه و که‌مده‌سی گرتگه‌سه‌ی له لا بوودجه‌ی ده‌وڵه‌تی‌وه، پێشنێیار دده‌م ک ده عراقیش، پارلمان ئیجووره داڕێشتێ په‌سه‌ن بکه‌ێ تا هه‌م که‌سری بوودجه‌گه وه‌ی پاسا بکرێ هه‌میش ده‌رانه‌ی عراق وه رووی دنیاوه وازتر بکرێ.
هه‌ر چه‌ن وه بوونه‌‌ی ئی هه‌مگه جه‌نگ و جڵاوه ک که‌فتگه و خه‌ڵکه‌گه‌یش داکاسیان و ده‌رئامه و پاشده‌سیێگ به‌ش خوه‌یان چوونه‌و ک دڵنیا ببن و ئێسا و بانان خوه‌یان نه‌دیرن، باوجی ئه ئیجووره قانوونێگیش بنرێ تاێ فره وه پێشوازی له‌ی دڵ خوه‌ش نه‌که‌یمن چوون وه‌ز و وه‌زیات عراق جوورێگه ک سه‌رمایه‌تاڕنه نه سه‌رمایه‌گیر هه‌ر که‌س له ده‌سێ بیاێ، سه‌رمایه‌گه‌ی له عراق ده‌رچنێ و واینێ تا ئاسووده‌سه‌ر بمینێ، وه‌لێ یه داڕیشتێگه ئه‌ڕا یه ک هماڵکه‌می نه‌گرنێگه‌مان و نه‌مینیمنه جی له وڵاته‌یل دنیا و ناوچه‌گه‌مان.
یه چ خاسیێ ئه‌ڕا ئیمه دیرێ؟
ئیمه‌ی کورد فه‌یلی، چ ئه‌وانه ک هانه نام عراق و هێمان ناسنامه نه‌دیرن و له ئی هه‌ق که‌مه ک ماف وڵاتوه‌ندییه‌گه‌یان بناسرێ هه‌م بێدهس بێده‌سهه‌ڵات مانه و له زێد و ماوای خوه‌یان ده پروسه‌ی ته‌عریب کریانه‌سه دهر و چ ئه‌وانه‌ی ک ناسنامه‌و ئقامه‌ته‌یله‌یان دڕین و ده‌س نانه مل ماڵ و مینێیان و چه‌پاوێ کردن ئه‌ڔا خوه‌یانه‌یل و ده‌وڵه‌ت و ئێسه فره له‌یان ده هیچ جی دنیا ناسنامه نه‌دیرن یا تامه‌زرووی گرتن ناسنامه‌ی عراقن، ده‌روه‌چ، هه‌ر چه‌ن چه‌ن سوو ده‌رزنێ ده وه‌راوه‌رێیان دچه‌کرێ ک وه ته‌ما بکه‌فن تا ئاخرێ ده وڵات داڵگی و ده باوان خوه‌یان، ببنه خاون چه‌ن لاپه‌ڕه ناسنامه.
وه‌لێ پوول و پاره‌ی ک به‌ش سهرمایهگوزاری بکرێ له کاملا بیارن؟
ئه‌ر له چاو ئنسانی بنووڕیمن وه‌ێ نه له روانگای سیاسی و وه‌رچاو ته‌نگی یا دوچاوه‌کی کردنه‌یل عه‌شیره‌یی و مه‌زهه‌بی و حزبایه‌تی، جواوه‌گه‌‌ی فره ساده‌سه.
برا و خوشکه‌یل ده‌س‌ده‌ناو عراقی، گڕێ ئه‌ڵگه‌ردن وه ده‌هه‌ی په‌نجا و شه‌س و هه‌فتا و هه‌شتای میلادی، بنووڕن بینن ک کورد فه‌یلی ده عراق چه داشتگه ک رژیم به‌عس وه تاڵان بردگه‌سه‌ی، خوداو‌ڕای، خوه‌یان بنیشن و کڵاوه‌ی خوه‌یان بکه‌ن وه قازی، هه‌ر چێ له‌مان بریاگه بننه بان ترازی و بکیشنه‌ی بزانن هامترازی دیرێ وه‌رد چه‌نێ سهرمایهگوزاری ده عراق، خوه‌ی و خه‌یر و به‌یر بانکییه‌گه‌ی بخه‌نه وه‌ر چه‌م، هه‌ر چێ ده‌رهاورد وه خڕ تاڵێ له پرچ دایه‌ی نێشتمانم، عراق گه‌ورا، وه‌لێ ئی داڵگ خۆ بایه‌د جوور دایه بکه‌ێ نه جوور باوه‌ژن. له جی ئه‌و هه‌مگه ماڵ و مینمانه ک کیشاگه‌سه بان، چه‌ن لاپه‌ڕه وه نام ناسنامه‌ی عراقی وه‌مان بده‌ێ، هه‌ر چه‌ن وه‌و ناسنامه وه دهر ده‌رانه‌ی دووزه‌خیش رێمان نه‌دده‌ن، باوجی چوون یه بییه‌سه گن خوسه و نیشتگه وه جه‌رگمان، هه دخوازیمن ک هرووفمان بمرێ بویشیمن ئاخرێ ده باوان خوه‌مان، بیمنه خاون ناسنامه.
ئه‌گه‌ر به‌رپرس و نوێنه‌ره‌یل دخوازن ئی کاره بکه‌ن نام خودا بیارن، لای رووێیانیش ماچ دکه‌یمن، ئه‌ر نه خوه‌یان نه‌دخوازن ئی هه‌ڕه‌کیشه‌کی گه‌ورا و گه‌وری بییه، چاره‌سه‌ر بکه‌ن، خۆ دی هیچ، وه‌لێ بوێرانه بویشنه‌ی ک هێمان خوه‌یان وه‌و ئازایه‌تییه نه‌ڕه‌سینه، وه‌و بوێرییه بڕ نه‌کردنه ک ئه‌و حوکمه ک ئه‌ڔا خوه‌یان وه ره‌وا زاننه‌ی و بڕێ له‌یان وه جی یه‌ک ناسنامه، دو یا چه‌ن جنسیه هن چه‌ن وڵات ها ده بن گیرفانێیان، ئه‌ڕا گشت وڵاتوه‌نده‌یل عراقی، دوفێشتر کورد فه‌یلی بێدهس و بێ‌که‌س، ره‌وا بزاننه‌ی ک ره‌وێشت حوکمره‌وایی خاس، ها له بان ئیجووره ره‌وادارییه‌یلێ.
ئیمه گوڕ و گورجیمن ک هه‌ر چێ ک وه تاوان هێز گرتن و راوسیان ده وه‌راوه‌ر رژیم به‌عس دانایمنه، بنیمنه‌ی وه هیچ وه‌و مه‌رجه ک وتم؛ نرخێ بنن ئه‌ڕا لا‌وه‌که‌م سهرمایهگوزاری و داین ناسنامه وه جیه‌ی، وه سه‌نگ ئه‌وه ناسنامه ببڔن و بده‌ن وه‌و بنه‌ماڵه‌یل کورد فه‌یلیبه ک په‌رکه‌نه و بێ‌سه‌ر و شوون هانه نام یا ده ده‌روه‌ی عراق، یه داخوازیاری فره‌یێگ نییه، ئه‌ر جوور ئایم و وه چاو ئایمه‌تی بنووڕیمنه ئی هه‌ڕه‌کیشه ک پیر کردگه ده گیان عراق و نوای بنه‌ڕا ناین بنیاته‌یل دموکراتیک و ئه‌ڵکه‌فتگ و پێشکه‌فتگ ده ئی وڵاته گرتگه و سای نگریس و میرات پڕ له نه‌هات و نه‌هامه‌تی بوروکراسی سه‌ددام، هێمان بڕۑ له ده‌رانه‌یل خۆ هیچ، ده‌روه‌چه‌یل پێشکه‌فتن وه روویمان به‌سییه، ئاخین و داخینمه.
