جه‌شن خاوه‌نکار کوردی
شه‌فه‌ق نیوز- عه‌یده‌گه‌ی یاران یا جه‌ژن خاوه‌نکار، یه‌کێ له دیاری‌ترین جه‌ژنه‌یل کورده‌یل (یارسان/ ئه‌هڵ هه‌ق و کاکه‌ئی)یه.
وه ئی جه‌ژنه، جه‌ژن مه‌ره‌نوو یا پاتشایی هه‌م دویشن و هه‌ر ساڵه ده نام مانگ ئابان هه‌تاوی، سه‌ره‌ی زمسان کوردی، ک ده بان رووژژمێر کوردی گه‌رمه‌سێری سوڵتانی، هساو دبێ، ئایین ئی جه‌ژنه دگرن.
ئی جه‌ژنه سێ رووژه و ده ئی سێ رووژه یارسانییه‌یل رووژگ دگرن و ئمجا رووژگوانه‌یل هه‌نار، که‌ڵه‌شێر کوردی، وه‌رد نان گرده و کولێره به‌ش که‌ن ده وڵات و ئی کرداره کوانه دیارنه جی.
ئه‌هڵ هه‌ق و یارسانیه‌یل ده ئێران هانه ناوچه‌ی گوران و رووژئای کرماشان، ئوو له‌ک کرماشان و له‌کستان ده لا ژۆر لوڕستان و لاخوار هه‌مه‌دان، کلارده‌شت و شوماڵ ئێران، هه‌شتگرد که‌ره‌ج، وه گه‌رد ئازه‌ربایجان.
هووز یارسان، بیر و بیڕگێیان یه‌سه ک ده ئیجووره رووژه‌یلێ حه‌زره‌ت سوڵتان سه‌هاک به‌رزه‌نجه، بنه‌ڕانه‌ر یارسان و دین یاری، ک وه خاون‌که‌رم دناسنه‌ی، ده سه‌ده‌ی هه‌فتم، وه‌ختێ بانگه‌وازی کرد و وڵات، وه دین یاری چڕی، بڕێ ده وه‌ر ئه‌و وه‌رێ وسان و ئاخرسه‌ر له نام خوه‌یان تاڕاننه‌ی. سوڵتان وه‌رد سێ یار خوه‌ی، یانێ ("داوو/ داوت" ، بنیامین، پیرمووسا،)، سه‌رئه‌ڵگرتن و دان ئه‌و کێوه‌یل هه‌ورامان.
ده نامقه‌ی رێگه، هووز چیچه‌کییه‌یل سه‌ر رێ له‌یان گرتن و ئه‌وان کوت ئه‌ڵه‌یان کریا ک بچنه ناو ئشکه‌فتێ وه نام "نووه" خوه‌یان ئه‌وبشارن.
وه ئشکه‌فت، ده زاراوه‌ی کوردی گورانی "مه‌ڕ"یش وتنه و ئه‌ڕا یه‌سه وه ئی جه‌ژن، جه‌ژن پاتشایی مه‌ڕنوو هه‌م دویشن.
ده ئی سێ رووژه ک ئه‌وان.، ورسگ و تیه‌نگ، خوه‌یان هشار کردنه ده مه‌ڕه‌گه، که‌یوانوو نوورانه‌ی ک بڕێ وتنه "دایراک خاتوون" داڵگ حه‌زره‌ت سوڵتان بییه، نان و تووشگ ئه‌ڕایان هاوردگه.
ئی تووشگه، که‌ڵه‌شێرێ وه‌رد برنج بییه ک ئه‌وسا ئاش یا پیلی وه‌ێ دوِتن هاوردگه.
دۆمای سێ رووژ ک یاران سوڵتان پیرووز دبن و ئی راوسیانه وه سه‌رئه‌نجام دڕه‌سێ، ده رووژ چوارم گرد وڵات جه‌ژن دگرن و له‌و ساڵه تا ئێسه گشت یارسان، ده هه‌ر جیێ له دنیا ببن، ئی سێ رووژه رووژگ دگرن و ده چوارم رووژه‌گه جه‌ژن دگرن و خه‌یرات و کردار دکه‌ن
باسه بزانن، ئی سێ شه‌وه، ده کات‌ژمێر کوردی گه‌رمه‌سێری سوڵتانی، له دوانزه‌هم تا چوارده‌هم مانگ گه‌لاوێژه، ک ئمساڵ دکه‌فێگه هه‌فتم تا ده‌هم ئابان‌مانگ هه‌تاوی.
یه‌کم‌شه‌وه‌گه وه (شه‌و نییه‌ت)، دوێم شه‌وه‌گه وه (خاوه‌نکار) و سێیم شه‌وه‌گه وه (جه‌ژن خاونکار) دناسرێ ک ده ئی شه‌وه رووژگوانه‌یل ده‌م دچه‌کنن و پاشیم دکه‌ن و خوه‌یان ئه‌ڕا جه‌شن گه‌پ ئی رووژه‌گه‌ی ئاماده دکه‌ن.
